Catholic Kohhran centenary lawm ṭan

Mizorama Catholic Kohhran chuan an kum 100-na, centenary an lawm ṭan a, February 1, Inrinni khan Christ the King Cathedral, Kulikawnah centenary lawmna hawn a ni a, Aizawl bishop Most Rev. Stephen Rotluanga'n a hmanpui.

Catholic Kohhran centenary lawmna hman chhoh tur hawnnaah hian dar vawi 100 vuak a ni a, Most Rev. Stephen Rotluanga'n jubilee kawngkapui a hawng a, centenary logo biak in tina târ tur a tlangzarh bakah, jubilee bati a dep kai bawk. Centenary thupui chu 'Catholic rinna nunpui la, puang chhuak rawh' tih a ni.

Kumin 2025 chhungin kawng hrang hrangin centenary an lawm zui dawn a, kum tawpah St. Lawrence Church, Ramthar Vengah khâr a ni ang.

February 1, 1925 khan mi panga - Lianchheua, Thangphunga, Lênga, Chalchhuna leh Lalbâna, Tlangnuam mi vekte'n Mizoramah Catholic Kohhran an din a. February 1927-ah biak-in hmasa ber sa zoin, Christ the King Church tih a ni.

Kum 1947 aṭangin Mizoramah Catholic puithiamte an ṭhu nghet a; kum 1996 aṭangin Aizawlah bishop an ṭhu ṭan a, Aizawl Diocese tih a ni.