LESDE Minister-in Union Minister a kâwm

Sorkar thil pawimawh tia New Delhi-a zin Labour, Employment, Skill Development & Entrepre-neurship (LESDE) minister Lalnghinglova Hmar chuan January 31, Zirtawpni khan Skill Development & Entrepre-neurship (MSDE) minister Jayant Chaudhary kâwm a, skill development leh sports suih fin theih dan tur leh pawimawh dangte a sawipui.

Lalnghinglova Hmar chuan MSDE kaihhnawiha Mizoram hmalakna leh mamawhte a sawi a; MSDE hnuaia Sports Sector Council (SSC) hmang ṭangkai turin Mizoramin hma a lak mek tih thu sawiin, Mizo ṭhalaite tuina leh thiam zawng pahnih - skill development leh sports suih fin a nih theih nan SSC hotute nen an indawr mek thu leh, February 2025 chhungin Mizoramah meeting neih tum a nih thu a sawi.

Jayant Chaudhary chuan, Mizoram LESDE leh Sports Minister hmalakna chu ṭha a tih thu leh puih a inhuam thu a sawi a; kumin March thlaah Mizoramah zin a tum thu a lo hrilh.

Minister pahnihte hian PMJVK kaltlanga LESDE department project thehluh chungchang te, PMKVY hnuaia Mizorama skill development training kalpui mek dinhmun leh hmalak ngaihna laite pawh an sawi dun bawk.

Lalnghinglova Hmar hian January 31 vêk khan Ministry of External Affairs joint secretary Surinder Bhagat pawh a hmu a, ram danga Mizo hnathawkte’n harsatna an tawh ṭhinte a sawipui.

LESDE Minister chuan, Mizo ṭhalai ram danga hna thawk turte chu dan hnuaiah him takin kal se a duh thu a sawi a; Emigration Act, 1983 hnuaiah Mizoram sorkar chu registering authority-a awm an duh thu a thlen a ni.

Surinder Bhagat chuan, Emigration Act hnuaia registerring authority dil theih dan a sawifiah a, MEA leh LESDE department aṭangin bawhzuitu tur official an ruat nghal. LESDE Minister ngenna hi tihhlawhtlin a nih chuan LESDE department chu Mizoram aṭanga dan anga MEA kaltlanga ram páwna hna thawk tur thawn chhuaktu a ni thei dawn a ni.