September 6, 2024 (Zirtawpni) tlai khan Land Revenue & Settlement (LRS) department-in ram teh leh a kaihhnawih ṭul dangte thawk tura a rawih empanelled survey firm-te chu Aijal Club-ah tlangzarh a ni. Tlangzarhtu minister K Sapdanga chuan, ram changkang apiangah chhiah an chawi tam thu a sawi.
K Sapdanga chuan, ram changkang apiangin chhiah an chawi tam a, India ramah pawh state changkang apiangah chhiah an chawi hnem thu a sawi a, "Sorkar hausakna leh mipui hausakna chu chhiah a ni. Sorkar a hausak loh chuan mipui a hausak theih loh. Ram pachhe taka mimal hausa chu a hlauhawm ting mai," a ti.
Mizoramah chhiah pek a har lutuk chu veiawm a tih thu sawiin Sapdanga chuan, "Chhiah pe tura mipui intlar ngai, chhiah dawngtu turte biak hleih theih loha an awm ṭhin hi mak ka ti. Mipui hi chhiah pe turin kan thlêm zawk turah ka ngai," a ti a, mipuite'n nuam ti taka chhiah an pek theih nan ṭan lak a ngaih thu a sawi.
Home Minister chuan, state changkangte sum bâwm chu chhiah a nih thu sawiin, "Central-a pawisa kan dilte pawh chhiah tling khawm a ni. Hmasawn kan tum chuan mipuiin chhiah kan pek tam a ngai. Budget-a chhiah pekna tur thar a awm lote hi ram changkang loah chuan intihtheihna atan an hmang a, intihtheihna chi a ni lo," a ti.
K Sapdanga chuan, empanelled survey firm-te chu sumdawng tura pên chhuak anga an inngaih a hlauh thu hrilhin, "Hlâwk ringawt in tum chuan chhawr tlak loah in tla vat ang. Intihsiakna ṭha in neih ka duh," a ti a; Mizoram siamṭha tura theihtawp chhuahpuiah a sáwm.
LRS minister B Lalchhanzova pawhin thu sawiin, "India ram hi land revenue leh reforms-ah a thleng thui tawh si a, department hah ber kan nih a ngai. Step lak kim loh kan ngah. Muang ringawt ila, SASCI kan thál thei dawn lo, land revenue leh reforms nei ṭha tawhte angin tehfung an siam si," a ti.
B Lalchhanzova chuan, Mizoram hnufual bikna chu rei lote chhunga tihdik a ngai tih sawiin, "Chau hman kan ni lo. Kan hna hi rawngbawlna a ni a, hlawh lakna tur ringawt a ni lo. Mahni hna ngaihthah hi eirukna a ni ve tho. Mahni pawisa tur ni lo lak ringawt hi eirukna a ni lo," a ti a, mahni hna thawk ṭha lo chuan a eiru tihna a nih thu a sawi.
Ruahmanna an siam chu a ṭha ber a ni lo thei tih sawiin LRS Minister chuan, "Kan ramin a mamawh tawh si avangin hetiang ruahmanna hi siam a ni. Department lama thawktute inpekna a nasa hle a, anni zarah heng hi kan puitlin thei ta a, an thawhrimnaah lawmthu ka sawi tak meuh a ni," a ti.
B Lalchhanzova chuan, empanelled survey firm-te chu sorkar hmasa hun aṭanga ruahmanna awm tawh a nih thu sawiin, "Tling lo tak chunga mawhphurhna ka lak ve chinah a theih ang angin kan bawhzui ve mawlh mawlh, ràwn ṭul angte ka ráwn bawk," a ti a, state dang tih dante pawh an zir thu a sawi.
LRS department hian empanelled survey firm 13 an ruai dawn a, anni nen inremna neiin, ram teh leh ṭul dangte an thawk ṭhin dawn a ni.
