Chawr chhuahna zahpui lo turin zirlaite chah

Tuipuiral Zirlai Pawl (TZP) chuan nimin khan Chanmari YMA Hall-ah Freshers' Social an hmang a, minister of state Lalnghinglova Hmar-in a hmanpui. Minister chuan, an chawr chhuahna zahpui lo a, tihmingṭhatu nih tum turin zirlaite a chah.

Lalnghinglova Hmar chuan, TZP-te'n zirlai tharte lawmna pual inkhawm thupui atan 'Hun vawn dik' tih an hmang chu ṭha a tih thu a sawi a, "Mi hlawhtlingte'n hun an hman dik ṭhin avangin zirlaite'n zingkár hman ṭangkai tum ula, hun vawng dik mi nih tum ang che u. In chawrchhuahna zahpui loin, a tihmingṭhatu nih tum ula, mahni khawchhuahna ngaipawimawh ang che u," a ti a, zirlaite chu an nu leh pate thu awiha, chawimawi ṭhin turin a chah a ni.

Zirnaah inelna a nasat thu sawiin Minister chuan, "Mi dangte nen hna zawn kawngah in la inel a dawn avangin hlawhtling thei turin tun aṭang hian inpuahchah lâwk rawh u. Zirna tih loh thil dangah inhnamhnawih tam lo u la, rilru pawt péng thei lakah inthiar fihlim thiam a ṭha," a ti.

Lalnghinglova Hmar chuan, sorkar hnain mi zawng zawng a daih loh thu sawiin, eizawnna ngêlnghet pe thei dangte ngaihven tel turin zirlaite a chah a, "Hun kal tawha thil pawimawh te, kan awmna leh a chhehvel hmunhma awm dan te, ram inrêlbâwlna kalhmang, inlumleh dan leh sukthlekte ṭha takin zir ang che u," a ti a; ruihhlo leh a kaihhnawih lakah inthiar fihlim a, sorkar thawhpui turin zirlaite a chah.

Sports Minister chuan, India-in Olympic 2036 thlen a tum thu sawiin, "Hemi atan hian Mizote'n eng nge kan tih ve theih tih kan ngaihtuah mek a, Mizoram hmun hrang hranga thiamna leh theihna awmte awmze nei lehzuala zawn chhuah tum a ni," a ti.

Khualzahawm Ramthanmawia, East Tuipui bialtu MLA pawhin thu sawiin, zirna sang zawk belh tum, harsatna tâwkte pui turin a inhuam reng thu a sawi.

Inkhawm hi TZP vice president Benjamin Rochhunga'n a kaihruai a, TZP aṭanga mi hmingṭha leh zirnaa hlawhtling tharte hnenah lawmpuina leh chawimawina hlan a ni. TZP hi kum 1986-ah din a ni a, Fresher's Social ṭum 16 an hmang tawh a ni.