Khawtlangin kawng chhia an siam

Sakawrtuichhun leh Central Jail Veng khaw­tlangte chuan September 7, Inrinni khan hnatlangin an huam chhunga kawng­pui chhe zual laite an thawm ṭha.

YMA, Sakawrtuichhun Branch hruaitute hnen aṭanga thu dawn danin, an veng kawng an thawm ṭhat hi YMA bultuma neih a ni a; kawng siamna atan kohhran, tlawmngai pawl leh political party-te'n pawisa thawhin, cheng nuai 3 vel an thawh khawm bakah, mimal ṭhenkhatin road­roller, excavator, tipper leh lungte an thawh bawk.

Sakawrtuichhun hna­tlangah hian mi 600 vel an thawk chhuak a, kawng khuar lai leh tui tlinnate chu lung hmangin an hnawh a ni. Inrinnia an hnatlannaah hian an ngaimawh zualte an siam zo hman lo a, tun karah a ṭul anga siam chhunzawm an tum a ni.

Central Jail Veng khawtlang pawhin Inrinni khan an huam chhunga kawngpui chhe zual lai thawm ṭhat hnatlang an ko a, mi ṭhahnem tak an thawk chhuak.

Sakawrtuichhun leh Central Jail Veng khawtlang hnatlang hi bialtu (Aizawl West-I) MLA TBC Lalvenchhunga'n a tlawh a; Sakawrtuichhun hnenah Rs 5,000 a pe a, Central Jail Veng hnenah an mamawh ṭhenkhat a tumsak bawk.