CDF-te'n Zokhawthar tleirawl pahnih ni 6 chhung an hrèn hnuah an chhuah
Myanmar rama Chin state chhunga Chin Defence Force (CDF), Hualngoram chuan tun hnai khan Zokhawthar râwlthar pahnih chu ni ruk chhung hréngin, kut an thlak nual a; September 6, 2024 (Zirtawpni) tlai khan an chhuah.
Assam Rifles aṭanga thu dawn danin, September 1, 2024 khan Zokhawthar rawlthar panga chu Kenbo bike pahnih hmanga Rihdila an kal chu CDF mite'n an lo tibuai a; tleirawl pathum chu an tlanchhiat hman laiin, pahnih chu CDF-te chuan an man thung. Hetianga an lo tihbuai chhan hi a hmain Zokhawthar mi tho mi dangte nen an lo intihbuai tawh vang nia hriat a ni.
CDF-te'n an man mi pahnihte hi kum 15 leh 16 mi an ni a; Rihdil báwr vela ni hnih an hrèn hnuah September 3 khan Seik khuaa CDF jail-ah an khung a; jail chhungah chuan kut an thlak nual. An lu an ziah kawlhsak a, an lu leh taksa hmun ṭhenkhatah meizial nungin an nawr a; pakhat zawk há an tihbalsak bawk.
Assam Rifles hotute chuan, hetianga Mizoram aṭanga kalte laka CDF an chêt chhan hi Rihdil leh India-Myanmar ramri bâwr vel an thununzia leh an thuhnuaia awm a nihzia an lantirna nia a lan thu an tarlang a, "CDF police-te hian CNA venhimna hnuiaiah Myanmar leh Mizoram aṭanga bungrua thawn luh leh chhuak zawng zawngah chhiah an la ṭhin," an ti.