Rodingliana'n Union minister pathum a kâwm

Minister of state F Rodingliana chuan September 7, Inrinni khan New Delhi-ah a department enkawl kaih­hnawih sorkar laipui hotute a kâwm a; Mizoram sorkarin kum thum hma lama project a thehluh tawhte bawh­zuiin, hmasawnna tura mamawhte a thlen.

F Rodingliana hian Union Power minister Manohar Lal Khatta hnenah Mizoram sorkarin kum thum hma lama kawlphetha pek chhuahna transmission line leh power sub-station tihchangtlungna project a thehluh tawh, Ministry-in a pawm tawh leh bawhzui loa a awm avanga sum la pek chhuah loh chungchang a thlen a ni.

Union Power Minister chuan, sumte chu an pek chhuah tur thu leh Ministry of Power-in hydel project lian tham siamna tur scheme thar a duan chu chhawr ṭangkai turin central PSU-te nen thawkho a, project thehlut vat turin F Rodingliana a chah.

Ministry of New & Renewable Energy (MNRE) minister Pralhad Venkatesh Joshi nen an inkawmnaah F Rodingliana chuan, kawlphetha hmanga intodelh chu Mizoram sorkar policy lian ber a nih thu sawiin, Mizoram sorkarin small hydel project siam tur a buaipui mekte chu MNRE hnuaia scheme hmanga tihpuitlinsak turin a ngen. Pralhad Joshi chuan an puih tur thu a lo hrilh.

Commerce & Industries minister F Rodingliana hian Mizorama food processing industry-te tihlena tihchangtlung chungchangah Food Processing minister Chirag Kumar Paswan chu a inah a kâwm bawk. Chirag Kumar Paswan hian project eng emaw zat siama thehlut tura chahin, a lo bawhzuisak tur thu a lo hrilh a ni.