KHAWTHLIR

Thisen unit 233 pe

September 7, Inrinni khan pawl paliin thisen unit 233 an pe. ṬKP, Ramhlun Bial-in ZMC tan thisen unit 96 an pe a, petute mipa 82 leh hmeichhia 14 an ni. KṬP, Zemabawk Bial-in Synod Hospital tan unit 69 pein, petute mipa 64 leh hmeichhia panga an ni a; KṬP, Zotlang Branch-in Civil Hospital, Aizawl tan unit 42 pein, petute mipa 32 leh hmeichhia 12 an ni. Mizoram PYD, Kolasib Diakkawn Bial member mipa 16 leh hmeichhia 10-te'n Kolasib District Hospital tan unit 26 an pe bawk.

BMP-in thian fai

Baptist Mipa Pawl (BMP), Aizawl Central Pastor Bial chuan September 7, Inrinni zing khan Aizawl Lei leh a chhehvel an tifai. Hnatlangah hian BMP member 26 an thawk chhuak a, bawlhhlawh a tam avangin bawlhhlawh báwm (garbage bag) an ken daih chin tâwk an tifai a ni. BMP hruaitute chuan, Aizawl Lei hnuai leh a chhehvelah ruihhlo leh dan phal loh thil ti ṭhin an tam a, inchiuna hmanrua hmuh tur a tam thu an tarlang.

CS-in thing phun

Nute puala thing phun beihpui thlakna, 'Ek Ped Maad Ke Naam' campaign pualin September 7, Inrinni khan chief secretary Dr Renu Sharma leh a nu Prema Rani te chuan Chief Secretary Bangla tualah thing an phun. Ek Ped Maad Ke Naam campaign hi World Environment Day pualin Prime Minister-in a tlangzarh a; Mizoramah pawh Environment, Forest & Climate Change department hmalaknain forest division hrang hrangah thing phun a ni.

Run for Health

Mizoram State AIDS Control Society leh Lawngtlai College Red Ribbon Club chuan September 7, Inrinni zing khan Lawngtlaiah hriselna pawimawhna leh HIV/AIDS laka fihlim tura inzirtirna 'Run for Health' marathon an buatsaih a, bawrhsap Cheemala Siva Gopal Reddy-a'n Lawngtlai Areopagy aṭangin a vailiam. Marathon-ah hian Lawngtlai College zirlaite an tel a, Areopagy aṭanga Lawngtlai College Veng thleng an tlan a ni.