Istanbul-a NE India Festival-ah tel

Turkey-a Consulate General of India leh North East Institute of Fashion Technology (NEIFT), Guwahati-ten Turkey khawpui Istanbul-a September 6, 2024-a ‘North East India Festival 2024’ an buatsaih chu Art & Culture minister C Lalsawivunga'n a chhim a, Art & Culture director Carol VLMS Dawngkimi leh cultural troupe-te'n an ṭawiawm.

Festival-ah hian C Lalsawivunga chuan thu sawiin, "India hmarchhak state-te hi kan awmna hmunin a zir loh avangin India ram rila state dangte nen kan inlaichinna a ṭha tâwk lo a, kan Indian-puite ngei pawhin min mikhual en mai bakah, ram dang mite phei chuan India mi kan ni tih rin harsa an ti ṭhin. Turkey-a India Consulate leh NEIFT-te'n hetiang hun ṭha leh remchang an buatsaih hi a lawmawm tak zet a ni," a ti.

North East India Festival 2024-ah hian hmarchhak state pariat aṭangin hnam lâm leh zaite entir a ni a; Mizoram aṭangin Art & Culture department cultural troupe-te'n Cheraw lam an entir. Hmarchhak state tina designer-te kutchhuak thawmhnaw pho chhuahna hun (fashion show) buatsaih a ni bawk.