MoRTH CE hoin Tuidam leimin enfiah

Mamit thlang Tuidam bula National Highway (NH)-44A kawng minna hmun chu September 7, Inrinni khan Ministry of Road Transport and Highways (MoRTH) North East Region Zone-V chief engineer Aditya Prakash leh Mizoram PWD hotute'n a hmunah an enfiah.

NH-44A kawngpui hi kumin August 23 leh 27 khan ruahsur nasa avangin a min a; leimin hi kawng chhawk lam aṭanga inṭan a ni a, kawng pawh a min tel a, lirthei kal tlang theih a ni lo.

Thuneitute chuan, NH-44A min thenfai hna chu MoRTH aṭangin thawh a nih dawn thu te, thla khat chhungin lei leh lung tla paih fai tum a nih dawn thu te, khawl tam zawk hmanga hna thawh a nih dawn thu an sawi a; kawng chhuat chûl mâm leh thawm ṭhat hna erawh NH-44A contract work aṭanga thawh tum a nih thu an sawi bawk.

Inrinni vek khan SDO (Sadar) Carolyn LB Khiangte kaihhruaiin YMA Sub-hqrs, Mamit hruaitute leh PWD hotute leimin chungchangah an inkâwm. YMA hruaitute chuan, leimin chuan khawthlang tlangdung inkalpawhnaah harsatna nasa tak a siam avangin then hna chak taka kalpui turin PWD an ngen a; tuna inkalpawhna kawng awm chhun Mausen kawng hlui chu thawm ṭha thuai turin an ngen nghal a ni.