MSCW Chairperson-in bànna a thehlut: 'La thawk chhunzawm thei ka ni' - Lalchhandami

Mizoram State Commission for Women (MSCW) chairperson C Lalchhandami chuan September 7, Inrinni khan Social Welfare Secretary hnenah MSCW chairperson aṭanga bànna a thehlut a; a kum dik tak ang chuan la thawk chhunzawm zel thei a ni tih a tarlang.

C Lalchhandami chuan a bànna lehkhaah hian, March 8, 2024-ah MSCW chairperson atana ruat a ni tih tarlangin, "He ka mawhphurhna hi theihtawp chhuahin ka chelh zui a ni. He hna ka thawh chhung hun rei lo tê, thla nga chhung hian case hearing 102 lai ka nei hman a, hlawhtlinna 80% a awm tawh," a ti.

A awm hma kum 5 chhungin case hearing an neih zat chu 86 a ni tih tarlangin C Lalchhandami chuan, "Ka chairperson chhung hian hmasawnna nasa tak kan hmu thei tih a hriat awm e," a ti a; ZPM party thil tum zinga pawimawh bera ngaih 'Ram rorelnaa Pathian tun din' tiha thawh hlâwk ber zingah MSCW an tel thu tarlang.

C Lalchhandami chuan, a pian kum chungchangah eptu political party-te aṭangin beihna nasa tak a tâwk tih tarlangin, "Kum 65 thleng chelh theih a nih avangin ka kum dik tak ang chuan la thawk chhunzawm zel thei tur chu ka ni. Hetiang boruak karah chuan chak tak leh ṭha tak, phûr taka thawh zuite pawh a harsa dawn," a ti.

A awmna political party hruaitute nen an inbiakrâwn hnuah party inchirhthehna boruak ṭha lo tak awm zui tur ṭha an ti lo tih tarlangin C Lalchhandami chuan, "MSCW ngei pawh a zahawmna vawn him zel a nih theih nan chairperson ka nihna aṭang hian inhnuhdawh mai ṭhain ka hria a ni," a ti a; bànna a thehluh chu pawm ngei turin a ngen a ni.

MNF Legal Board chuan C Lalchhandami hi kum 65 a pel tawh nia an ngaih avangin September 9, 2024 tlai dar 5 hmaa báng turin an phût a; document lem a hmang nia an hriat avangin September 6, 2024 khan Bawngkawn Police Station-ah FIR an thehlut bawk.