ZPM kaihhruai sorkarin health care scheme thar a duan, Universal Health Care Scheme (UHCS) chu August 2024-ah tlangzarh hman beisei a ni a; UHCS-ah hian sorkar hnathawkte leh pension tawhte telh tum a ni.

Vanglaini palai zawhna chhangin Health minister Lalrinpuii chuan, health care scheme ṭha tak nei turin theihtawp an chhuah tih a sawi a, "Universal Health Care Scheme a nih ang ngeiin Mizoram mipui zawng zawng huamtir kan tum. Health care ṭha thei ang ber neih kan duh a, theihtawp kan chhuah. Meeting pawh ṭum eng emaw zat kan nei tawh. Tun hma anga harsatna a awm loh kan duh a ni," a ti.

Lalrinpuii chuan, pensioner-te leh sorkar hnathawkte thun vek tum a ni tih sawiin, "Health care-ah hmun hnih aṭanga hamṭhatna dawn a rem loh avangin uluk taka ngaihtuahna sen a ngai. Pensioner-te phei chu an health care neihah sum an dawng tam thei si lo a, health care tharah hian tel ve ngei se kan duhsak," a ti a; UHCS-ah chuan Rs 5,00,000 thleng pawisa pek nghal ngai loin damdawi-inah inenkawl theih a ni dawn tih a sawi.

Sorkar hnathawk leh pensioner-te nen inbiakna a kal mek tih sawiin Minister chuan, "Sorkar hnathawkte nen hi chuan kan inbe fel thawkhat tawh a, an monthly contribution turah tlemin kan la indawr deuh. Pensioner-teah chuan contribution turah harsatna kan la nei. Pensioner-te health care thara an tel hi an tana ṭha tur a nih avangin an tel ngei kan duhsak a ni," a ti.

Health Minister chuan mimal damdawi-inte nen pawh an inbiak mek thu sawiin, "Anni nen pawh ṭha taka kan inrem theih ngei kan beisei," a ti a; mutàn la awmte inbiakremna hmanga chinfel zel a nih a beisei thu a sawi.

August 2024-ah chuan UHCS tlangzarh hman an inbeisei thu sawiin Lalrinpuii chuan, "Kan tlangzarh hman ngei ang ka ti ngam lo. Kan tlangzarh hman a nih pawhin thla tawp lamah a nih a rinawm. Kan duh uluk a, mipuite'n health care scheme ṭha tak an neih kan duh avangin a kal zung zung theih loh. Theihtawp kan chhuah mek zel a ni," a ti.

Tarlan tawh angin, June 26, 2024 khan Mizoram State Health Care Society (MSHCS) chuan circular tichhuakin, health care scheme thar peih a la nih loh thu an tarlang.

MSHCS tarlan danin, Mizoram State Health Care Scheme policy kal lai mek April 2023 - March 2024 chu scheme thar hman tur avangin June 2024 thlenga hman theih tura pawhsei a ni a; scheme thar hi hman tura peih a la nih loh avangin April 2023-March 2024 chhunga inziak lutte tan July 2024 thlenga hman chhunzawm leh tur a ni.

Hetih lai hian, July 2024 thlenga hun pawhsei hian policy anga sum hman theih chin bituk Rs 2,00,000 hmang zo tawhte a huam lo a; District-a chief medical officer-te an bial ṭheuhah lo puangzar tura hriattir an ni.