KHAWTHLIR

KṬP-in thisen pe

July 13, Inrinni khan KṬP, Leitan Branch chuan Synod Hospital tan thisen unit 42 an pe a, petute mipa 38 leh hmeichhia pali an ni. KṬP, Vaivakawn Branch pawhin an kohhran hall-ah ZMC tan unit 42 an pe a, petute mipa 29 leh hmeichhia 13 an ni.

Missionary retreat

Synod Mission Board-in July 11, 2024 zan aṭanga Bawngkawn Presbyterian Kohhran biak-ina Missionary Retreat an huaihawt chu nizan khan a ṭiak. Retreat hi India hmarchhak biala Synod hnuaia missionary-te leh an chhungte tana buatsaih a ni a, thupui chu 'Chanchin ṭha hril' tih a ni. Nimin chawhma dinhmun angin, hmarchhak biala mission field pasarih aṭangin missionary 710 leh an chhungte an tel a ni.

Raltlan ṭanpui

Central YMA chuan July 13, Inrinni chawhnu khan Beraw tlanga Manipur raltlan zinga nau hnuchham enkawlnaah ei tur leh mamawh dang an hlân a, Rs 50,000 hu a ni. Raltlan hnuchham enkawlnaah hian naupang 24 leh thawktu mi pali an awm.

AR-in heroin man

Assam Rifles chuan July 12, 2024 khan Kawlchaw khuaah hmeichhe pahnih hnen aṭangin heroin gram 11.95 an man a, Rs 8,36,000 hû a ni. July 13, Inrinni khan Melbukah ram dang meizial e-cigarette bâwm 2,413 an man bawk a, nuai 18.49 hû a ni.

Minister-in tlawh

Health minister Lalrinpuii chuan July 13, Inrinni khan Ṭawipui South Primary Health Centre, Thingkah Sub-Centre, Thingfal Sub-Centre, Ṭawipui South Sub-Centre leh Ṭawipui North Health & Wellness Centre-te a tlawh a; mamawh an lo thlente chu a theih anga bawhzui a tum thu a sawi.

Luiah tla hlum

C Lalneihpuia (30), Lunglei chu January 13, Inrinni khan Tuirial luiah a tla hlum. Thu dawn danin, C Lalneihpuia hi Solid Waste Management Centre, Turiala hna thawka awm niin, a ṭhianpa nen sangha man tumin Muthi chhuah lam Tuirial luiah an kal a, sangha a chhar tur chesualin tuiah a tla a ni. Tuirial Airfield khawtlangin an zawng nghal a, nimin zing dar 7:20 velah a tlakna aṭanga km. 4 vela ngar an hêmah a an hmu a ni.

Kolasib DC-in vawk lak luh khap

Kolasib District Magistrate chuan Kawnpui, Mualvum, Serkhan, Khamrang leh Serlui B-a vawk farm-ahte African Swine Fever a lên mek avangin vawk chungchangah khapna thupek a tichhuak. Kolasib District Magistrate chuan Kolasib district-ah vawk, vawksa, frozen pork, vawksa rep leh vawksa aṭanga thil siamte lak luh a khap. Vawk damlo talh leh hralh khap a nih thu a tarlang bawk.