LAMPS-in chawimawina dawn an lawm

Champhai Large Area Multipurpose Society (LAMPS) chuan tun hnaia National Cooperative Development Corporation Regional Awards for Cooperative Excellence and Merit 2023 leh Mizoram Cooperative Apex Bank Best Cooperative Society 2023-24 an dawnte July 13, Inrinni khan an lawm a, Cooperation minister PC Vanlalruata'n a hmanpui.

PC Vanlalruata chuan, Champhai LAMPS-te'n kum 43 chhung society an kalpui tawh leh lawmman an dawng chu chhuanawm a tih thu a sawi a, "Society dangte tan entawn tlak darthlalang ṭha tak in ni. Mizoram sorkarin hand holding policy leh thlai thar lei tihhlawhtlin nan cooperative society-te thâ chakna rin a tum a, mahse, society thawhpui tlak an tlem. Society din thar leh tihchak kawngah ṭan lak a ngai," a ti.

Hun rei lo têah State Level Cooperative Development Council din a nih dawn thu sawiin Minister chuan, "District tinah district level cooperative union din tum a ni," a ti a; society enkawlna inkhaidiat mumal tak a awm chuan society nung ṭha tak tak khaw tinah an awm chhoh theih a beisei thu a sawi.

PC Vanlalruata chuan, kut hnathawktute hmakhua ngaiin sorkarin thlai sawngbawlna lian zawk din tumin hma a la mek tih a sawi a, "Cooperative society-ten heti lama hma an lak duh chuan sorkar a inhawng hle," a ti a; thlai sawngbawl lamah rilru seng turin Champhai LAMPS hruaitute a ngen.

Minister hian New Champhaia Agriculture & Farmers Welfare department ram leh Champhai LAMPS-ten NABARD aṭanga cheng vbc 1.3 an hmuh hmanga an din Agriculture Infrastructure Building-te a tlawh nghal a ni.