CM-in Godrej Group hotupa a kâwm

Chief minister Lalduhoma chuan July 13, Inrinni khan Mumbai-ah Godrej Group president Rakesh Swami a kâwm a, Mizorama Godrej Agrovet hmalakna a sawipui. Rakesh Swami chuan, hotu dangte nen kumin August thlaah hmalak theihnate en turin Mizoramah zin an tum thu a sawi.

Sorkar thuchhuah tarlan danin, Chief Minister leh Godrej Group President-te hian Bukvanneia oil palm mill tihchangtlun chungchang te, Godrej Samadhan center Mizorama kalpui chungchang te, oil palm chingtute'n thlai dang - sawhthing, aieng, hmarcha leh a remchang dang nena chìn pawlha hlâwk zawka hna an thawh theih dan turte an sawi dun a ni.

Rakesh Swami chuan, Mizoramah sapthei, sangha chaw leh leiṭha sâwngbawl te, sahbon leh glycerin siamna bun te, poultry farm leh frozen food lama hmalakte an tih theih a beisei thu CM Lalduhoma a hrilh a; an hmalak theihnate en turin Godrej group enkawl hnuaia sumdawnna hrang hrang hotute nen August thlaah Mizorama zin an tum thu a sawi.