Minister-in sorkar laipui hotute a kâwm

Food, Civil Supplies & Consumer Affairs minister B Lalchhanzova chuan kar kal ta chhung khan Delhi leh Kolkata-ah sorkar laipui hotute a kâwm a, Mizoram mamawh hrang hrang a thlen.

B Lalchhanzova hian July 10, 2024 khan Union Consumer Affairs, Food and Public Distribution minister Pralhad Joshi chu a chennaah kâwmin, National Food Security Act (NFSA) chungchang leh consumer welfare lama nasa zawka hmalak dan tur a sawipui a; Mizoramah NFSA hnuaia awm tur zinga la awm lo eng emaw zat an awm avangin NFSA-a an awm ve theih nan hmalakpui turin a ngen.

Pralhad Joshi nena an inkawmna bawhzuiin July 11, 2024 khan Food and Public Distribution secretary Sanjeev Chopra leh Department of Consumer Affairs (DOCA) secretary Nidhi Khare te a kawm. Sanjeev Chopra chuan, NFSA quota tihpun chu India ram puma household consumption expenditure survey data-te uluk taka zir chian a nih hnua ngaihtuah ṭhat tur a nih thu leh, hun rei vak loah hrual mûm a beisei thu a lo hrilh.

FCSCA Minister hnenah hian Nidhi Khare chuan consumer awareness leh right chungchangah, Mizoramah consumer-te hmun dang aia an inthlarun avangin a bik taka ngaihtuah an ngaih thu a sawi a; ruahmanna thehlut turin a lo chah a ni.

Land Revenue & Settlement minister B Lalchhanzova hian July 11 vêk khan Development of North Eastern Region (DoNER) secretary Chanchal Singh a hmu a; Mizoram LRS department tihchangtlunna tur ruahmanna hrang hrang Mizoram sorkarin a neihte hrilhin, tihhlawhtlin a nih theih nana theihtawp chhuahpui turin a ngen. Chanchal Singh chuan, Minister thu thlente chu ṭha a tih thu leh tihhlawhtlin theih thilte a nih avangin ruahmanna an dawn hunah a lo hriat tur thu a sawi.

B Lalchhanzova hian July 12, 2024 khan Kolkata-a Hindustan Petroleum Corporation Limited oil terminal a tlawh a; general manager Kaushik Roy Choudhury leh a thawhpuite nen an inkâwm. Minister chuan, Mizoramah tuialhthei mamawhna a san zel thu sawiin, petrol retail outlet tam zawk Mizorama bun belh turin a ngen.

HPLC hotute chuan, Mizoramah oil depot an siam theih nan a rang thei anga bera a hmunhma tur enfel a, hmalak thuai an tum thu Minister an hrilh bawk.