Lawngtlaiah Rakhine mi leh sa an awm: 'Venhimna khauh zawk kalpui a ni dawn' - DC

Lawngtlai bawrhsap Cheemala Silva Gopal Reddy chuan, Lawngtlai district mai ni lo, Lawngtlai khawpui chhungah pawh Rakhine state (Myanmar) mi leh sa an awm tih a beng a thlen thu a sawi a, "Venhimna khauh zawk kalpui a ni dawn," a ti.

Tun hnaia Central Young Lai Association (CYLA) leh tlawmngai pawl dangte nen an inkawmhona-ah Lawngtlai DC chuan, "Tun dinhmunah Lawngtlai khawpui chhung ngeiah Rakhine State (Myanmar) mi leh sa an awm tih thawm ka beng a thleng. Hemi chungchang hi Assam Rifle-te nen kan sawiho tawh," a ti.

Lawngtlai Bawrhsap chuan ramri khauh zawka venghim tura hmalak mek zel a nih thu sawiin, "Police patrolling pawh zing leh khauh zawk a kalpui a ni. Tlawmngai pawlte ngenna anga security check post tam zawk siam chu thil pawimawh tak a ni," a ti a, thuneitu sang zawk hnenah a thlen tur thu an sawi.

CYLA hruaitute pawhin tun hnaiah Myanmar ram Rakhine state aṭangin Arakan hel pawl mite ralthuam kengin Lawngtlai chhungah an lo lut tih an sawi a ni.

Ram leilung fate him leh zalen taka an awm chu thil pawimawh hmasa a nih thu sawiin Lawngtlai DC chuan, "Raltlan chungchangah ngaihtuahna thûk zawk neih a ṭul rual a, tlawmngai pawlte nena lungrual taka thawhho pawh a ṭul hle," a ti a; an district chhunga raltlan awm mekte nawr chhuah tumna a awm loh thu a sawi bawk.