Minister-in Observation Home a tlawh

Social Welfare and Tribal Affairs minister Lalrinpuii chuan July 12, 2024 khan Lawngtlaia Shakti Sadan Office leh Observation Home a tlawh a; sorkar laipuiah hmeichhia ṭanpui ngaite tana chèn lailawkna tur tam zawk sakna tur sum dil belh zel a tum thu a sawi.

Lalrinpuii chuan, mipuiin Shakti Sadan an chhawr ṭangkai tâwk loa a hriat thu sawiin, "Awareness-ah ṭan lak a ngai. Ministry of Women and Child Development hnuaiah hmeichhia pawngsual tâwk, baihvai, awmna mumal nei lo, dan bawhchhia leh thildanga harsatna tâwkte tan ṭanpuina ṭha tak a duang a, heihi mipuiin kan hriata kan chhawr ṭangkai ve a hun tawh," a ti.

Rethei leh chanhai zawkte tan sorkar laipuiin ṭanpuina scheme leh program tam tak a duang ṭhin tih sawiin Lalrinpuii chuan, "A puan darh kawngah uar zawka hmalak a ngai. Shakti Sadan changtluk zawka kalpui zel tura sum leh pai mamawh a hun taka dawng thei turin hmalak mek zel a ni. Khawvel hmasawnna karah sualna a pung ve zel a, hmeichhiate dikna chanvo rahbeh a nih lohna turin ke pen ve zel a ṭul," a ti.

Minister chuan, Lawngtlai district-ah hmeichhia harsatna tâwk mek tam tak an awm thei tih hriaa theihtawp chhuah turin Shakti Sadan hnuaia thawkte a chah a, anmahni pantute chu duat leh hmangaih taka lo enkawl turin a chah bawk.