Remal vanga chhiatna tuarte tan CYMA-in ṭanpuina a sem chhuak

Central YMA chuan July 13, Inrinni khan CYMA Hall-ah Cyclone Remal vanga chhiatna tuarte ṭanpuina sem inkhawm an buatsaih a, Rs 56,54,000 an sem chhuak.

Cyclone Remal vanga chhiatna tawkte chhawmdawlna hlan inkhawm hi CYMA assistant secretary Fabian Lalfakawma'n a kaihruai a; general secretary Prof. Malsawmliana'n chhiatna thlen dante leh ṭanpuina luh dan a sawifiah.

Thu sawitu CYMA vice president Prof. Lalnuntluanga chuan, YMA chu ṭanpui ngaite ṭanpuitu a nih thu sawiin, "Lusûn mangang, chhiat tâwkte ṭanpuitu pawl a ni. YMA hi amah maia ropui a ni lo a, Mizo mipui, YMA member-te vanga innghahna tlak pawl a ni a, Mizote tana pawl ropui leh innghahna tlak, ṭanpui ngaite ṭanpuitu YMA-ah hian i tui thar zel ang u," a ti. Ṭanpuina thawhtute chungah an lawm thu a sawi bawk.

CYMA finance secretary MS Ralte kaihhruaiin chhiatna tuarte ṭanpuina sem a ni a, ṭanpuina sem chhuah zawng zawng chu Rs 56,54,000 a ni. Aizawl leh a bul hnai deuha mite chu ṭanpuina sem inkhawmah hlan an ni a; Lunglei, Serchhip, Saitual, Mamit leh Khawzawl sub-hqrs hnuaia mite chu thawn an ni.

CYCLONE REMAL ṬANPUINA PEK DAN

MITTHI: Mi 37 (Mizo 29, hnamdang 8) an thi a; mitthi chhungkua 11 hnenah Rs 1,00,000 zelin Rs 11,00,000 pek a ni.

IN CHHIA: In/bungraw chhia hmun 309 aṭangin report an dawng. In chhe vek 142 tuartute hnenah in pakhat tan ṭanpuina Rs 27,000 zel an pe a; Aizawla in 32 atan Rs 8,64,000 leh Aizawl khawpui pawn lama in 110 atan Rs 30,49,000 pek a ni.

BUNGRAW CHHIA: Bungraw chhiaah Rs 1,80,000 an pe a; in pakhat tan Rs 10,000 zel pein, in 18 tan an pe.

 THLANMUAL CHHIA: Thlanmual chhia report 16 an dawng a, thlanmual pakua atan Rs 3,50,000 an pe chhuak.

* Hlimen relief camp in sak ṭanpui nan Rs 1,00,000 an pe.
* Hliam Clara Zoremmawii (6) d/o Baby Zoremsiami, Melthum Rs 10,000-in an kan.
* YMA, Hortoki Joint ruang zawnnaah Rs 10,000 an pe.