Mizoram sorkarin total lockdown a kalpui mek chu May 24, Thawhṭanni zing dar 4-ah a tàwp dawn a; hetih lai hian doctor-te chuan, Mizoram dinhmun thlirin, inkhàrkhipna thlahdul vek chu a la hun loah an ngai.
Vanglaini palai zawhna chhangin Indian Medical Association (IMA), Mizoram State Branch president Dr Rosangluaia chuan, medical line aṭanga thlir chuan total lockdown chhunzawm zel chu duhthusam a nih thu a sawi a, "Chutih rualin, mipui tan leh sorkar tan tlin tâwk chin a awm tawh ngei ang," a ti.
Dr Rosangluaia chuan, Mizoram dinhmun thlir thiam a har thu sawiin, "Inkhuahkhirhna hlih vek chu thil tih chi a la ni loah kan ngai. Sorkarin a thlahdul hret a nih chuan thu hran a ni a, hlih tawp chu a ngamawm loh hmel," a ti a, dinhmun a la hlauhthawnawm thu a sawi.
IMA President chuan, Mizoramah Covid-19 a la darh nasa hle tih sawiin, "Positive an la tam hle a, sample test tam vang phei chu a ni ang. Backlog (inhnawhkhawm) an test ṭeuh a, backlog lo pawh an test tho ang. Chutih rualin, a darh nasa tih lan chianna chu RAT hmanga test positive an tam hi a ni. RT-PCR hmanga test-te chu containment zone leh quarantine-a awmte an ni hlawm a, RAT hian a darh dan a tichiang ber," a ti.
Mizoram Government Doctor Association (MGDA) president Dr Chawngthanchhunga chuan, páwl angin total lockdown an la sawiho loh thu a sawi a; medical line aṭang chuan tun dinhmunah inkhàrkhipna thlahdul nghal vek chu a la zuamawm loa a hriat thu Vanglaini a hrilh.
MGDA President chuan, total lockdown chu ṭha mah se, mipui leh economy sorkarin a ngaihtuah ve a ṭul thu a sawi a, "Kan ram hruaitute'n a ṭha tur ang berin ro an rél thiam turah ka ngai. Thutlukna ṭha tak tak an siam thiam khawp mai," a ti.
