Infiammi 3-te Rs. 50,000 ṭheuh pe dawn

Mizoram State Sports Council (MSSC) chuan Mizo infiammi pathum, India ram aiawha international competition hmachhawn mekte hnenah Rs. 50,000 ṭheuh a pe dawn.

Sports & Youth Services minister Robert Romawia Royte chuan nimin khan Mizo infiammi pathum - boxer Lalbuatsaihi, Tuithiang, weightlifter Jeremy Lalrinnunga, Govt Complex leh hockey player Lalremsiami, Kolasib-te chu MSSC-in infiammi ti ṭha bikte tihhmasawn nana fund a neih aṭangin Rs. 50,000 ṭheuh a pek dawn thu a sawi a ni.

SYS Minister chuan, "Covid hripui avangin infiammi ti ṭhate puala incentive cash award sem tur pawh function lian buatsaih theih a nih loh vangin a khawtlai rei tawh. Hripui avangin infiammite'n sum an mamawh nasa zual tih sorkarin a hre nãin, a reh mai theih si loh avangin online-a ceremony neiin sem mai pawh a ṭul mai thei," a ti a; infiammi 1,400 chuang hnenah lawmpuina sum sem a nih tur thu a sawi.

Sports Minister tarlan danin, Lalremsiami chu Youth Olympics leh Asian Games 2019-ah silver medalist a ni a, a inbuatsaih zel nan Mizoram sorkarin Rs. 20,00,000 a pe tawh. Jeremy Lalrinnunga chu Youth Olympic champion a nih avang leh a inbuatsaih zel nan Mizoram sorkarin Rs. 15,00,000 a pe tawh bawk. Lalbuatsaihi chu 2020 World Police Boxing Championship, Tokyo-ah a champion a ni.