ZMC tana Muallungthu sikul ram pekah Mipui ràwn an ni lo - INC, Muallungthu

Congress party Muallungthu unit chuan thuchhuah siamin, Muallungthu Middle School leh Primary School hmun leh ramte an khaw VC-in ZMC zauhna atana Health Minister hnena an pek chungchangah khawtlang mipui ràwn an ni lo tih an tarlang.

Muallungthua Congress party chuan, "Muallungthu M/S leh P/S hmun, a ram neitu Education department leh khawtlang mipui beráwn miah loa VC-te'n Health department hnena an hlan mai hi pawi kan ti hle a ni," an ti a; VC-te chu School Education department leh khawtlang mipui ráwn chunga ngaihtuah ṭha leh turin an phût.

Muallungthu unit Congress party tarlan danin, June 12, 2020-ah Muallungthu VC (term hmasa 2015-2020) leh YMA hruaitute chu Health minister Dr R Lalthangliana'n a pisaah a kâwm a, Muallungthu M/S leh P/S ram chu ZMC zauhna atan an duh thu a sawipui a ni.

June 30, 2020-ah Health Minister bakah, Health secretary Lalengmawia leh ZMC director Dr T Lalhmangaihi te Muallungthuah kalin, VC leh YMA hruaitute nen sikul ram chu a hmunah an en. Chumi ṭum chuan khawtlang hruaitute chuan, sikul ram chu Education department ta a nih avangin VC-in an pek theih a nih loh thu an sawi a; Minister chuan, Education department lam a lo biak tur thu a sawi thung.

Muallungthu Congress unit chuan, "Hetih hun laia VC leh YMA hruaitute chuan Health department-in M/S leh P/S ram lak an tum tak tak dawn a nih chuan, khawtlang mipui ráwn chungin, inremna siam tura ruahmanna kalpui a nih mek laiin VC term (07.09.2020) chu a lo tàwp ta si a, ZMC tana ram lâk chungchang thu haw lam leh kal lam hriat zui a ni ta lo a ni," an ti.