Lungleia RTPCR hman a la ni lo hi Mipui zah lohna a ni - CLP Leader

Congress Legislature Party (CLP) leader Zodintluanga Ralte chuan, Civil Hospital, Lungleia RT-PCR kháwl vawiin thlenga hman a la ni lo chu mipui zah lohna a nih thu a sawi.

Nimina thuthar thehdarhtu ṭhen­khatte nen an inkawmnaah Zodin­tluanga chuan, Covid-19 lên tirh aṭanga mithiamte'n an ngaih pawimawh chu sample endik tam a nih thu sawiin, "Mithiamte chuan a veite hmuh chhuah vat vat a, enkawl vat vat ṭha an ti a. RT-PCR hmanga test theihna Mizoramah chuan Aizawlah chiah a la awm a, sorkar ta, UNICEF aṭanga dawn, ICMR aṭanga dawn leh mi ṭhahnemngai pek pakhat ṭheuh hman a ni," a ti.

CLP Leader chuan, Civil Hospital, Lungleia RT-PCR dahna tur laboratory dinna atan Health department-in NEC-ah detailed project report an siam thu an la sawi chauh tih sawiin, "RT-PCR khawl pek a nih aṭanga kum khat vel hnua DPR siam chauh hi Zoram mipui hmuhsitna leh zah lohna a ni," a ti a; Lungleia RT-PCR khawl hman theih tura hma la ṭha duh loah Mizoram sorkar a puh.

Zodintluanga Ralte chuan, RT-PCR hman loh chhana Health department chhuanlam pakhat, RNA extractor awm lo tih chu chhuanlam tling a ni lo tih sawiin, "Manipur leh Vety ta RT-PCR hman a nih lai pawh khan manual-in kalpui theih a ni. Lungleia laboratory siam a pawimawhna chu, ZMC laboratory-ah positive pakhat a awmin khâr a ni a, Lungleiah a function chuan ZMC a buai pawhin Aizawl aṭang pawhin thawn theih a ni ang," a ti.

Covid-19 dona kawngah Health Minister leh Health department avangin Chief Minister a mualpho nia sawiin CLP Leader chuan, "Health Minister leh department hmalakna a ṭhat loh avangin sorkarin dem a hlawh phah," a ti a; sorkar chêt dan leh kalphung a fuh tâwk loh chuan a tàwpa mi dem hlawh ṭhin chu CM an nih ṭhin avangin, Covid-19 donaah pawh mi tih dik loah Mizoram CM-in dem a hlawh thu a sawi.

Zodintluanga Ralte chuan, Health department chêt dan ṭha tâwk lo nia a hriat pakhat sawiin, "Central aṭang leh state aṭangin pawisa an han dawng a, an sum hman danah Finance lam an mangang a, an audit hial. Frontliner leh hospital lam tihchangtlun aiin, an sum hmannate chu walkie talkie man to takte leh RT-PCR man deuh thawa toa refrigerator leite a ni. Mipui tan sum an hmang hek lo," a ti.