Mizoramin WHO ṭanpuina a dawng
World Health Organization (WHO) chuan Mizoram sorkar hnenah Covid-19 vei, oxygen mamawhte hman tur oxygen concentrator 150 a pe a; nimin khan WHO surveillance medical officer Dr Lalhlimpuii'n Health minister Dr R Lalthangliana hnenah a hlan.
Dr R Lalthangliana chuan, WHO-in oxygen concentrator a pek chuan nunna tam tak a chhan chhuah dawn thu sawiin,"WHO aṭanga kan thil dawn hi ṭum khata oxygen concentrator kan dawn tam ber a ni," a ti a; Mizoramin Kuwait aṭangin oxygen cylinder pellet pali (cylinder 180), Spain aṭangin oxygen nasal tube 900 leh USA aṭangin viral transport media tube 300 a dawn leh dawn thu a sawi.
Sorkar thuchhuah tarlan danin, WHO Country Office for India hotute hnenah Health Minister-in nimin khan lawmthu sawina DO letter a thawn a; Mizoramin Covid-19 hri a do dan leh PPE, RAT leh RT-PCR hmanrua (kit) a tam thei ang ber ngaihtuahsak turin a thlen nghal a ni.
WHO hotute chuan, Mizoramin Covid-19 hripui a dona kawnga theihtawp a chhuahna chu an hriatpui thu leh lawmawm an tih thu lehkha an rawn thawn a; Mizoram mipui tan an din thu te, Covid-19 hripui léng vanga nunna chánte an ui thu te, an chhungte an tawrhpui thu te, hripui vanga thi an tlem theih nan kawng hrang hrangin theihtawp an chhuah reng thute an tarlang bawk.
Mizoram sorkar hian a hmain Switzerland, Ireland, United kingdom leh Taiwan aṭangin oxygen concentrator 225 leh Egypt aṭangin oxygen cylinder D-type 50 leh oxygen regulator 50, Switzerland aṭangin oxygen nasal canula 5,000 leh power adapter 100 a dawng tawh a ni.