KHAWTHLIR

Covid-19 lakah Dy. CM a fihlim
Deputy chief minister Tawnluia chu Covid-19 vei a ni tih May 8, 2021-a hmuh chhuah a nih hnuah, hripui a vei tawh lo tih nimin khan finfiah a ni. Tawnluia hian May 7 zanah nasa vak loin khawsik a nei a, chuvang chuan RAT hmangin a tûk zingah a swab sample endik niin, hripui a vei tih finfiah a ni a, Covid-19 veite enkawlna hmun bikah awm loin, inah a inenkawl a ni.

Ambulance pe
Minister C Lalrinsanga, Lunglei West bialtu chuan nimin khan Buarpui Primary Health Centre-a thawktute thuam chakna atan MLA fund aṭanga a lei ambulance a pe. Ambulance hi minister aiawhin a fapain Buarpui PHC-a medical officer Dr PC Lalvohbiki hnenah a hlân a ni.

Lungdaiin tanpui
Lungdai khua chuan an khuaa Covid-19 vei an awm loh avanga Pathian hnena lawmthu sawina atan Covid-19 vei mek tamna ber Chhinga Veng hnenah chawhmeh chi hrang hrang Pik-up phur li an pe. Chawhmehte hi Lugndai khuaa chhungkaw 370-te thawh khawm a ni.

Containment hlîp
Covid-19 léng vanga Builum (Serlui) - Chemphai inkar leh Kolasib Ṭumpui Veng ṭhenkhat, containment zone-a puan tawh chu nimin khan Kolasib DC Dr H Lalthlangliana'n hlih a nih thu a puang. Hemi rual hian, mipuite chu fimkhur leh invéng taka awm chhunzawm turin a hriattir bawk.

SRH-ah mi 17-in Ventilator hmang
State Referral Hospital (ZMC)-ah Covid-19 vei enkawl mek mi 179 an awm a, mi 32 chu ICU-ah awmin, chu'ng zinga mi 17 chu ventilator hmanga enkawl an ni. SRH-ZMC Bulletin tarlan danin, SRH-ZMC-ah hian nimin khan hripui vei mi 12 dah luh niin, dam tawh mi pariat chhuahtir an ni thung a; ward hrang hrangah mi 147 enkawl mek an ni.

CM Relief Fund sem
Khawzawl DC Zothan-mawia kaihhruaiin nimin khan Chief Minister’s Relief Fund (CMRF) aṭanga Khawzawl district-in Rs. 2,50,000 a dawn aṭangin inkhuahkhirh leh inkhàrkhip vanga hna thawk thei lo, khawsak harsa zuala ngaih chhungkaw 693 hnenah buhfai leh dailuah an sem. Bialtu MLA Tawnluia'n a bial chhunga task force 24 tana a pek Rs. 2,30,000 an sem bawk. Buhfai leh dailuah hi DC office-a thawkte leh veng/khaw hrang hranga VTF-te'n an sem a, a vaiin buhfai quintal 56 leh dailuah kg. 700 vel an sem. Ṭanpuina dawngtute chu Khawzawla chhungkaw 290 leh khaw dang 12-a chhungkaw 403 an ni a, an vaiin chhungkaw 693 an ni. Chhungkaw 693-ah hian mi 2,716 an awm ni.

Vaimimah fimkhur turin chah
Lungleia Agriculture officer (DAO) C Malsawm-kima chuan, vaimim chíngtute chu fall armyworm (FAW) lakah fimkhur turin a chah a; FAW laka invèn dan, damdawi leh mamawhte chu DAO office-ah lam theih reng a nih thu a tarlang. DAO chuan, vaimim ei chhetu FAW chu a hluar leh ṭan tih tarlangin, "Agriculture department chuan Mizoram district tinah vaimim thar chhuak tam turin hma an la mek a, hemi atan hian loneitu 3,550 hnenah vaimim chi (var Suraj-251) quintal 213 a sem. Vaimimte hi April thlaah tuhin, tunah hian a ṭo chho mek a, a ṭo hlim zîk ṭhenkhatah ei chhetu (fall army worm) hmuh a ni," a ti. Lunglei DAO chuan, vaimim chíngtute chu ngun taka an vaimim zîkte enfiah ṭhin tur leh, ei chhetu pangang an hmuh chuan Agriculture department-ah hriattir vat turin a chah a ni.