MLA leh councillor an bialah che chhuak

ZPM MLA leh councillor-te chu Covid-19 kaihhnawihah ṭanpuina pein an che chhuak a, nimin khan an bialah ṭanpuina an pe.

ZPM Legislature Party (ZLP) leader Vanlalhlana chuan tun hnai khan a bial, Aizawl North-I chhunga Bawngkawna Local Task Force-te a tlawh a, community covid care centre (CCCC) atana buatsaih tur chei ṭhat nan Rs. 30,000 a hlân.

Vanlalhlana hian Bawngkawn LTF hruaitute nen Covid-19 veite enkawlna CCCC atana buatsaih mek, Bawngkawn Brigade-a Gilead Special School enhoin, ṭul leh mamawhte an sawiho a; Bawngkawn LTF thawhrimna leh inpekna chu fakawm a tih thu a sawi. CCCC atana buatsaih mek Gilead Special School chei nan Rs. 30,000 a pe a ni.

AMC ward-XVI councillor R Lalawmpuii pawhin Ningani leh nimin khan a bial chhungah hripui léng leh inkhàrkhip avanga harsatna tâwkte a tlawh kual. Bethlehem Vengthlang leh College Veng LTF hnenah hand sanitiser litre 5 leh mask ṭhahnem tak, College Veng Taxi Welfare hnenah taxi driver-te chhawmdawl nan Rs. 10,000 a pe a; Bethlehem Veng LTF leh PHE Sector Office hnenah hand sanitiser leh hmai tuamna eng emaw zat a pe bawk.