MSHCS-a inziak lutte'n ei leh in senso an hmu lêt thei dawn
Covid-19 vei zinga Mizoram State Health Care Society (MSHCS) hnuaia inziak lutte'n inenkawlna senso bakah, ei leh in man MSHCS aṭangin an hmu lêt (bill) thei dawn.
MSHCS principal chief executive officer Dr Chawngthanchhunga chuan May 19, 2021 khan hriattirna a tichhuak a; sorkar pawmpui damdawi-in, dedicated covid health centre (DCHC), covid care centre (CCC) leh community covid care centre (CCCC)-a Covid-19 vei enkawl, MSHCS-a in ziak lutte'n an inenkawlna senso bakah, ei leh in man an bill theih dawn thu a tarlang.
Bill siamna tur 'claim form' chu Covid-19 veite enkawlna hmunah dah vek a ni a, thil ṭulte dahkhah hnuah MSHCS pisaah thehluh tur a ni.
MSHCS-ah hian October 2020 - 2021 September atan chhungkaw 1,12,427 an in ziak lut a, chu'ng zingah chuan Aizawl district-a mite tam berin, chhungkua 56,656 an awm.
