Aizawlah sa leh thlai man bithliah

Aizawl Municipal Corporation (AMC) chhunga thlai leh sa man bithliah tura committee din, Aizawl DC Dr Lalhriatzuali kaihhruai chuan nimin khan kumin May leh June atana sa leh thlai man an bithliah a, May 25, 2021-a hman ṭan tur a ni.

Sorkar thuchhuah tarlan danin, AMC huam chhungah hun eng emaw chen lockdown puan a ni tawh a, mipui leh sumdawngte tana lungdamna tur tâwka thlai leh sa man rualkhai zawka khawpui chhunga hralh leh lei sorkarin ṭul a ti a; committee chuan bazara rate-te uluk taka zir chiang chungin ruahmanna an siam a ni.

Sa leh thlai man bithliah thar kenkawh kawngah local task force-te'n an huam chhungah thuneihna an nei dawn a, dan bawhchhiate hrem pawh local council kutah dah a ni. Commerce & Industries department kaihhruaina hnuaiah Horticulture, Fisheries, AH&Vety, Legal Metrology leh AMC aiawhte'n Aizawl bazar fangin an endik ṭhin bawk ang.