CCC-a awmte'n ei leh in man Mahnia intum a ngai tawh dawn

Health & Family Welfare (HFW) department chuan, Covid care centre (CCC)-a awmte'n an ei leh in man an intum a ngaih tawh dawn thu an puang.

Health department chuan May 19, 2021 khan hriattirna chhuahin, CCC chungchanga inkaihhruaina an tichhuak a, kaihhruaina thar chu notification tihchhuah aṭanga hman ṭan tur a nih thu an tarlang. CCC hmunhma chungchanga point 7-ah chuan, "Ei leh in hi CCC-a awmte'n a man an tum tur a ni," tih a ni.

CCC chu damdawi-in emaw, health care facility emaw ni lo, sikul, hostel, commu­nity hall, etc., hripui veite enkawlna tura a ṭul anga siam rem a nih thu tarlangin HFW department chuan, "CCC-ah hian Covid-19 vei nia rinhlelh emaw, vei finfiah tawh emaw, natna lang chhuak lo emaw, na em em lo (very mild/mild)-te dah tur an ni," a ti.

Health department-in notification thar a tihchhuah ang hian district ṭhenkhatah pawh DC-te'n order an chhuah ve nghal bawk a; chutah chuan, CCC-a awmte'n an ei leh in man an tum tur chu ni khatah Rs. 300 a ni tih a lang.

Kolasib DC Dr H Lalthlangliana chuan nimin khan order a chhuah a, "Sorkar (HFW) order dt. 19.05.2021-a chhuak thar angin, sorkar enkawl CCC-a awmte tan ei man hi mania intum tawh tur a ni a. Kolasib district-a CCC kan neih, Jordan Centre, Seṭhawna lut turte tan pawh ei man hi pek ṭhin tawh tur a ni ang," tiin, ei leh in man pek dan tura ruahmanna a tarlang.

Kolasib Bawrhsap tarlan danin, CCC-a ei leh in man chu mi pakhat tan ni khatah Rs. 300 a ni a, CCC-a lut turte'n an luh dawnah an pêk lâwk theih rualin, pe lâwk thei lo tan an chhuah hmaa pek ngei a ngai

CCC-a awmte'n ei leh in man an pêk ṭan hun tur (order hman ṭan hun tur) chu May 27, 2021 aṭangin a ni a, CCC-a awm mek tan pawh order hman ṭan aṭanga a hnu lam zawnga an ei leh in man chu an pek a ngai dawn a ni.