Congress party-in ṭanpuina an sem

Mizoram Pradesh Congress Committee (MPCC) Covid-19 Monitoring Committee chuan nimin khan an party mi leh sate thawh khawm sumte Mizorama Covid-19 hluarna khua leh veng pakuaah an sem.

Ṭanpuina sem tura an kal chhuah hmain Congress Bhavan tualah MPCC hruaitute chu thuthar thehdarhtute hmaah ṭanpuina an sem chhan sawiin, "Mizoram mai bakah AICC chuan Covid-19 avanga harsatna tâwkte chhawmdawl a ngai pawimawh hle a, kawng hrang hrangin state hrang hranga Congress-te'n hma an la a, state ṭhenkhatah chuan Covid-19 vanga thi, phûmtu nei lote an phûm a ni," an ti.

MPCC hruaitute chuan, an thil tih chu a bul ṭanna a nih thu sawiin, "Covid-19 avanga harsatna tâwkte hi a theih ang angin chhawmdawl zel kan tum. Hei bakah hian Covid-19 donaah sorkar kal fuh leh tih dik tâwk lohnaa sorkar finchhuah turin Covid-19 Monitoring Committee chuan hma a la zel dawn a ni," an ti a, Congress party chu mipui tan an ding tlat dawn niin an sawi.

MPCC hian Aizawla veng panga - Chhinga Veng, Bethlehem Vengthlang, Bethlehem Veng, Electric Veng leh Chanmari bakah, Aizawl páwnah Nghal­chawm, Zokhawthar leh Bairabi task force-te hnenah Rs. 20,000 ṭheuh an hlân a ni.