Joint Electricity Regulatory Commission (JERC) for Manipur & Mizoram chuan, Mizoram sorkarin March leh April thla electric bill pek tur, Covid-19 lockdown vanga pek hun pangngaia pêk theih loh vanga a punna bik (late fee) ṭhîn loh tur a tih chu a ngaihtuah a; electric bill pek tlai vanga chawitir (late fee) loh chhung tur chu June 30 thleng a pawtsei.
Vanglaini palaiin a kawmnaah JERC hotute chuan, Power & Electricity Secretary hnen aṭangin electric bill chungchangah Electricity Act, 2003 Section 109 tlawhchhanin May thla tìr lamah lehkha an dawng. P&E Secretary chuan, inkhàrkhip vangin mipuiin a hunah electric bill an pek theih loh thu leh a huna bill pek loh vanga an chawi belh tur late payment surcharge (LPS) chu ṭhìn rih loh ni se tiin ngenna a thlen a ni.
P&E Secretary lehkha chu JERC chuan ngaihtuah nghalin, an pawmpui a, sorkarin a dil chin a pawmpui bakah, LPS chawi ngaih loh hun chu June 30, 2020 thleng an pawtsei a ni.
JERC hotute chuan, electric bill pek tlai vanga chawi belh tur (late fee) chauh a nih avangin mipuiin an electric bill ngaihdamna emaw ti lo se an duh thu leh, electric bill pangngai chu pek tho tur a nih thu an sawi.
JERC hotute chuan, khuarèl chhiatnaah chuan sorkar thu leh hla a lal ber tih sawiin, "Mipui hmakhaw ngaia sorkarin thutlukna a siamte tipuitling turin JERC hian electric lama dan hmanlai a thlahdul thei. Khuarel chhiatna bikah chuan Electricity Act 2003-in a sawi angin JERC aiin state sorkar thuneihna a sang zawk," an ti.
Ram puma inkhàrkhip ṭan hun, March 24 hmaa electric bill dawn si, inkharkhip vanga bill pe thei lote chu bill an pek tlai vanga pawisa an chawi belh tur reng reng chawitir loa thai bo vek tur a nih thu sawiin JERC hotute chuan, "P&E department hian pek tlai vanga an chawi tur bik hi a ṭhíng tur a ni lo," an ti a; hei hian June 30 thleng a huam dawn thu an sawi.
Sorkarin a dil aia rei, June 30 thlenga LPS chawitir lo tura thutlukna an siam chhan chu, Covid 19 vanga inkhàrkhip pawhsei chin tur hriat a nih loh vang a nih thu sawiin JERC hotute chuan, "RBI-in leiba pung awm loa rulh theih hun (moratorium period) thla thum chhung a phalsak vang a ni bawk," an ti a; LPS chawitir loh vangin harsatna lian a thlen an rin loh thu an sawi.
JERC hotute sawi danin, electric meter reader-te'n lockdown chhunga meter reading an tih theih loh chuan, March 24 hmaa meter reading lâk hnuhnung ber leh lockdown hlih hnua meter reading lak hmasak ber behchhanin, ni khat chhunga consumer-te'n kawlphetha an hman zat P&E-in a chhût chhuak ang a, chumi mil chuan bill zat tur an bithliah ang.
Consumer-te thla tin bill chhût chhuah chu a hlâwmin bill pakhatah siam leh tur a ni a, bill chu a zatve aia tam loin ṭum khat aia tama pek tlak consumer-in ziaka a dil chuan phalsak tur a ni. Consumer-te'n vawi khatah an pe tla lo a nih pawhin, bill pumpui chu June 30, 2020 ral hmaa pek tlak a ngai thung. June 30 hnu lamah chuan dan pangngai angin LPS chawi tel a ngai tawh dawn a ni.
JERC hotute chuan, Delhi leh Tripura-ah pawh JERC remtihnain Mizorama an tih dan ang chuan kalpui a nih thu an sawi bawk.
