Covid-19 in intodelh pawimawhzia a tichiang leh zual - Chief Minister

Chief minister Zoram­thanga chuan, Covid-19 hripuiin intodelh pawi­mawh­zia a tihchian zual thu a sawi a, "Hnam danga innghat lo a, theihtawp chhuahin tun hun hi kan hman ṭangkai a ṭul," a ti.

Nimin khan Chief Minister hoin Agriculture leh Irrigation & Water Resources changtu minister C Lalrinsanga leh official-te'n Covid-19 vanga lo­nei­tute harsatna tawh su­kiang tura hmalaknate leh buha Mizoram intodelh theihna tura hmalakna thar ruahmanna an sawiho a ni.

Chief Minister chuan, ei tura intodelh sorkarin a ngai pawimawh a, chu chu SEDP pawhin a tum ber zinga mi a nih thu sawiin, "Intodelh pawimawhzia chu tun Covid-19 hri léng hian a tichiang a ni," a ti.

Tun dinhmunah Agri­culture, Horticulture, AH&Vety, etc.-ahte hma­lakna thar siam belh Mizo­ramin a mamawh tih sawiin Zoramthanga chuan, "Kan kut hnathawktute sum lak luh a pun theihna tur leh hnam danga innghat loa theihtawp chhuahin tun hun hi kan hman ṭangkai a ngai," a ti a; ei leh in lama kan intodelh a ṭul thu a sawi.

Meeting-ah hian, Covid-19 vangin hmun ṭhen­khata leileta thawktu hnam dangte an haw avang leh lei lehna tur bâwng a awm loh avangin leilet ṭáwl mai tur a awm a, chu'ngahte chuan kháwl hmanga hna thawh a nih thuai theih nan Agriculture department hmalak dan tur sawiho a ni. Hlâwk zawk leh mihring thá séng tlem zawka buh thar tura ruahmanna siamte thlirho a ni bawk.