ZPM ṭhalaiin special session koh an phût
ZPM Ṭhalai president Malsawmzuala chuan nimin khan thuchah a tichhuak a; Covid-19 hri léng leh inkhàrkhip vangin eizawnna kalpui theih a ni lo a, chumi vanga chhuanchhama awm mekte khaichhuahna atan sorkar sum hman dan tur ruahmanna ṭha neih a ṭul tawh tak zet thu leh chumi atan chuan Assembly special session koh an phût thu a tarlang.
Malsawmzuala chuan, Mizoram sum dinhmun chu Finance changtu Chief Minister-in a sawi chian theih loh avangin an inrinsiak sup sup tih sawiin, "Chhuanchhama awm mekte khaichhuahna atan sorkar sum hman dan tur ruahmanna ṭha kan neih a ṭul tawh tak zet. Hemi kawngah hian chak taka hmalak a nih theih nan, hruaitute'n thu khat vuaa ngun taka an ngaihtuah theihna turin Assembly special session ko thuai turin sorkar kan phût a ni," a ti.
Lockdown leh curfew vangin department ṭhenkhat - Tourism, Sports & Youth Services, etc.-ah chuan sum hmanna tur a awm mang dawn rih lo tih sawiin Malsawmzuala chuan, "Heng department sumte hi Covid-19 dona atan hman ni se," a ti. SEDP hnuaia board hrang hrang MNF Ministry-in a din leh thawktute tan pawh hmalakna lian tham a awm theih dawn rih loh avangin, board-te chu ṭhiah a nih loh pawhin, sorkar sum tihek lo zawnga Covid-19 donaa hmang ṭangkai turin sorkar a ngen tih a sawi.
ZPM Ṭhalai President chuan, Covid-19 donaa task force, kohhran, páwl leh mimal ṭhahnemngaite'n theihtawp an chhuah leh sorkarin nasa taka ṭan a la te, state páwna Mizo tangkhangte an rawn haw theihna tura nasa taka hma latute leh kohhran hrang hrangin an hall-te quarantine centre atana an hmantirte chu lawmawm an tih thu a sawi.
Malsawmzuala chuan, hripui dona atana inkhuahkhirhnain a awh chen tur hriat a ni lo tih sawiin, "Eng ang takin nge Mizoram min luhchhuah ang tih sawi theih a ni lo. A chhe ber pawh tâwk tura inrálrin hi kan tihmâkmawh a ni," a ti.