KHAWTHLIR

Zotrek Adventure Club chuan nimin khan Aizawl Civil Hospital blood bank-ah thisen unit 6 an pe a; Mizo zinga Mount Everest láwn chhuak hmasa ber David Zohmangaiha'n May 18, 2013-a a làwn chhuah hriat reng nan May 18-ah an pe ṭhin a ni. Nimin vek khan individual voluntary donor mi 11 an awm bawk.

Discipleship Training Institute (DTI), Neih-bawih chuan nimin khan an hmunah zirlai thlahna inkhawm, 65th Batch Graduation Day an hmang. Inkhawm hi R Vanlalzauva'n a kaihruai a, principal Rev. Zaidarhzauva'n report a pe a, Sihphir Vengthar bialtu pastor Rev. VL Luaia Hranleh-in thuchah a sawi. Batch 65-naah hian Certificate in Theology leh Certificate in Missiology zirlai 22 (mipa 16 leh hmeichhia 6) awmin, Mizoram pâwn angin zirlai 12 an awm a, February 21, 2020-ah class an ṭan a ni.

Lalnunfeli (20) d/o Lalrindika, Khatla chu nimin tlai dar 5 vel khan Serluiah a tla hlum. Thu dawn danin, Lalnunfeli hi an ṭhiante nen Serluiah an kal a, a ṭhiante nen chuan chesualin, a rualin mi pathum tuiah an tla a, m,i dang pahnihte chhan hman an nih laiin, chhan hman a ni ve ta lo a ni.

Health Services-a Food & Drugs Administration Wing chuan thuchhuah siamin, tunlaiah methanol (methyl alcohol) hmanga hand sanitiser siam an awm thu leh, methanol chu wood spirit (zu chhe siamtu) a nih avangin in, hîp luh, vuna chulh a hlauhawm thu an tarlang. WHO leh khawvela public health agency-te'n alcohol-based sanitiser ṭha an tarlan chu ethyl alcohol (ethanol) leh isopropyl alcohol (2-Propanol)-te a nih thu an tarlang bawk.

Mizorama ICICI Bank chuan corporate social responsibility (CSR) aṭanga an lei Covid-19 dona hmanraw hrang hrang, Rs. 4,99,996 hû chu nimin khan Health minister Dr R Lalthang-liana hnenah an hlân. Hmanrua an pekte chu - nebulizer, pulse oximeter leh Q Amp Viral RNA mini kit 25052906 Qiagen-te a ni. 

Mamit district chhung­a quarantine facility-a khung hran mek­te chu mi 105 an ni a, mipa 69 leh hmeichhia 36 an ni. Khung hran mek­te hi sorkar hriatpuinaa Tripura, Assam leh Tamil Nadu aṭanga hawte an ni a; Mamit khawpui bikah SSA Boys Hostel-ah mi 18, Tourist Lodge-ah mi 31 leh Polytechnic-ah mi 20 an awm a, Kawrthah Girls Hostel-ah mi 12, Zawlnuam BDO Rest House-ah mi pasarih leh Zawlnuam High School-ah mi 17 an awm mek a ni.

Kolasib district-a Scouts & Guides-te chuan an chief commissioner Lalrambuatsaiha hoin nimin khan Kolasib DC Dr H Lalthang­liana hnenah Covid-19 chungchanga hmalaknaa hman turin hmai tuamna 400 chuang an hlàn.

Minister of state K Lalrinliana chuan nimin khan Phaisen khua ramri depa duty mek, Kolasib Ṭumpui Branch YMA member-te chhâwktu tur Kolasib Hmarveng Branch YMA member mi 30-te chu DC pisa tual aṭangin a vailiam. Phaisena ramri vengtu turte hi Kolasib district reserve volunteer task force an ni.