Tangkhang inhriattir 10,750 an tling Karnataka-a mite hruai haw tum mek

Covid-19 leh inkhàrkhip vanga state páwna Mizo tangkhang, Mizorama haw duh Task Group on Migrant Workers & Stranded Travellers hnena inhriattir chu mi 10,750 vel an ni tawh. Karnataka-a tangkhangte hruai haw tura ruahman mek a ni.

Vanglaini palai zawhna chhangin Task Group on Stranded Migrant Workers & Travellers state nodal officer P Jawahar chuan, tangkhang inhriattir chu mi 10,750 an chuang tawh tih a sawi a, "Haw duh zat hi a danglam reng a, inhriattir tawh hnua haw duh leh lote an awm ṭhin. Tangkhangte hruai haw tur hian hmalak mek a ni," a ti.

P Jawahar chuan, Karnataka, Delhi leh Hyderabad-a tangkhangte hruai haw tura hmalak mek a nih thu sawiin, "Sorkar pawmpuina kan ngaichâng mek. Ruahman dan chuan, Karnataka-a tangkhangte hruai haw tum hmasak ber an ni," a ti a; Delhi leh Hyderabad-a awmte hruai  hmasak zawk turah thu chiang a la awm loh thu a sawi.

Vanglaini-in document a neiha a lan danin, haw duh inhriattir hi Delhi-ah (Haryana leh Utter Pradesh-a tangkhangte telin) mi 2,193, Karnataka-ah mi 1,445 leh Telangana (Hyderabad)-ah mi 560 an ni. 

P Jawahar sawi danin, ṭum khatah rélah mi 1,500 aia tam chuan theih a ni lo a, chuvang chuan Delhi-a tangkhangte chu ṭum hnihah hruai haw an ngai dawn. Tihfel tur a tam avangin state hrang hranga tangkhangte a ruala hruai haw vek chi-ah an ngai lo.

Tangkhang hruai hawte chu Bairabi rel chawlhhmunah khawsik enna (thermal scanner) hmanga endik vek tur an ni a, chumi hnuah quarantine centre-ah Rapid Antibody Test hmanga endik vek tur a ni bawk.