Mipui thleng phâk ṭanpuina sem turin Finance Minister an phût

PRISM party ṭhalaite chuan thuchhuah siamin, inkhàrkhip kárah Mizoram mipuite'n budget kan, a bai leh a chhum ei châkin an ril a ṭám niin an tarlang a; mipui mimir thleng phâk ṭanpuina sem chhuak thuai turin Finance minister Zoramthanga an phût.

Covid-19 vanga India a buai hnuah state dangte'n mipui mimir chhawmdàwlna hrang hrang duangin an luang chhuak nia sawiin PRISM ṭhalai chuan, "Zoramah ve thung chuan sorkar zawk ṭanpui ngaia a awm leh mipui mimir chhawmdàwl záwnga sorkarin ke a la pên ve lo erawh lung­chhiatthlâk kan ti hle," an ti a; Zoramthanga kaihhruai MNF sorkar chu mimal, tlawmngai páwl leh kohhrante phènah mualpho chhe lutuk loin an awm a, an vànnei hlea an hriat thu an sawi.

PRISM Youth Front chuan, Finance enkawltu chief minister Zoramthanga'n, 'Kan budget hi chéng vaibelchhe sîng chuang a ni hrim hrim a. Kan duh chuan kan kang thei a, kan chhûm thei a, kan bai thei bawk...' tiin a lo sawi tawh niin an sawi a, "Covid-19 vangin economic activity kalpui hleih theih a ni lo a, inhlawhfate tán inhlawhna tur a awm mang lo a, dàwr hawn hleih theih loh lai a nih bawk avang­in tûn hi budget bai ei hun dik tak a ni," an ti.