DC leh kohhran hruaitute inkâwm

Serchhip DC Dr Lalzirmawia Chhangte hoin nimin khan DC meeting hall-ah Serchhip khawpuia Presbyterian kohhran paruk leh Baptist kohhran pathum aiawhte an ṭhukhawm a, Champhai DC mawhphurhna la mektu Mark Lalthanliana leh Champhai khawpuia Presby­te­rian kohhrana pastor-te an inkâwm bawk. Inkawmnaah hian state páwn aṭanga haw turte khung hranna tur chungchang an sawiho.

Dr Lalzirmawia Chhangte chuan, kohhrante chu sorkar hmalakna tichaktu leh tiphûrtu an nih thu sawiin, "Tunlai hri léng chungchanga kan inkaih­hruaina leh inenkawl dante chu a tlachawpa ngaihtuah a nih fo avangin felhlel deuhte pawh a awm thei a ni,'' a ti a; kohhrante chu sorkar thu chhuahte ngai pawimawha ṭawiawm zel turin a sáwm.

Mizoram páwna Serchhip district mi leh sa tangkhang mek 407-te an haw huna dah hranna atan kohhran hruaitute chuan an hall leh hmunhmate hman an remti tih an sawi. Kohhran ṭhenkhat aiawhte chuan, an hmunhmate hman a nih chuan khung hrante ei leh in leh senso leh ṭul dangte tumsak an inhuam thu an sawi bawk.

Sorkarin Serchhip district-a inkhung hranna tura a ruahmante chu mi 488 dâwl zo tura beisei a ni a, tun dinhmunah khung hran mi 53 an awm mek. Inkhung hranna hmun pakhatah hmun hran leh hun hranga hawte dah ho a remchan loh avangin inkhung hranna hmun tur a remchang anga ngaihtuah belh zel a ni.

Champhai DC Mark Lal­than­liana chuan, state danga tang­khangte an haw tak tak hunah dah hranna tur sorkarin a dâwl zo tâwk a neih loh avangin kohhrante puihna leh ṭawiawmna ngen a nih thu a sawi a, "Champhai district-a haw tur in report mi 700 chuang an awm a, sorkarin quarantine facility a siama leng bakah kohhranin mi 300 vel khungna an neih theih chuan awlsamna a siam hle dawn a ni," a ti.

Sorkarin kohhrante hnena ngenna a siam chu kohhran committee-te'n an ngaihtuah­na­ah, an remchang lo a nih pawh­in inthlahrung lo tur leh har­sat­­nate thuneitute hnena thlen hreh lo turin DC chuan a ngen a; kohhran hmunhmaa community quarantine centre siam kawngah kohhran leh veng mite himna ngaih pawimawh a nih dawn thu a sawi bawk.

Kohhran hruaitute chuan, sorkar aṭanga ṭanpui leh ṭawiawm tura ngenna chu tlan­chhiatsan thu a awm lo tih sawiin, DC aṭanga dilna chu a rang lama bawhzui an tum thu an sawi. Pastor-te chuan an bial chhung kohhrana quarantine centre neih theih leh theih lohna tura an ngaihte DC an hrilh a ni.

Meeting chuan, kohhrante an inhuam chuan, report kimchang DC Office-ah thlen se, DC Office-in final report lo buaipui se, an ti.