Facebook-a thu dik lo tidarhtu man a ni
Covid-19 chungchanga May 15, 2020 zana thu dik lo Facebook-a post-tu Bungkawn Veng, Aizawla cheng mipa pakhat, kum 33 mi chu police-te'n an man a, thubuai an siamsak.
Mizoram police thuchhuah tarlan danin, Bungkawn mi an man tâk hian May 15 zan khan Facebook-ah '‘Khatla North Quarantined Positive 1 an awm ta maw, engzah tak awm ang maw rawn haw ho mi 10,000 zingah hian… Kan sawrkar chak tak hian a puang vat vat turah ngai ilang’ tih a post a ni. Hei hi thu dik lo leh dâwt a nih thu Police chuan an tarlang.
Thu post chuan mipui a tih chî-âi em avangin khawtlang aiawhin khawtlang hruaitu pakhatin Aizawl Police Station-ah first information report (FIR) a thehlut a, police-te'n an chhui zui nghal. Thu dik lo post-tu chu May 18 khan an man a, Aizawl District Court-ah hruai nghal a ni.
Police thuchhuah tarlan danin, May 15 khan Khatla veng mi, Chennai aṭanga lo haw zingah Rapid Antibody Test (RAT)-a reactive (positive) a awm a, fimkhur thilah ZMC-ah a swab sample endik tura lak phei a ni. Covid-19 a vei lo tih finfiah nghal a ni a, May 16-ah chhuak leh nghalin, Khatla-a quarantine centre-ah dah leh a ni.
RAT reactive hi Covid-19 vei tihna a ni lo a, antibody test-na chauh a nih avangin Covid-19 vei anga sawi chu thu dik lo leh mipui tichîâi thei a nih thu Police-te chuan an tarlang. Damdawi lam thiamte pawhin, Covid-19 vang ni lo, natna leh thil dang vang pawhin RAT hmanga endiknaah positive theih a nih thu an sawi.