Khung hran mekte thawhpuiah sáwm

Covid-19 dona atana Mizoram sorkarin committee a dinte zinga pakhat, Committee on Covid-19 Psychological & Social Guidance chuan quarantine centre-a awm mekte pualin nimin khan thuchah an tichhuak a; state danga tangkhang, tun hnaia rawn hawa khung hran mekte chu an lo lawm thu an sawi rual­in, Mizoram a him theih nan thawhpuiah an sáwm.

    Mahni in lum pan nghal thei loa quarantine centre-a invawm luh ngai hi hrehawm kan tihpui che u a, harsatna hi mi tinin kan tâwk a, chhel takin, mi dang ang thoin tuar hram hram ang che. He hun khirhkhân hian tàwp hun a nei dawn.

    Quarantine centre hi Covid-19 laka kan him nan fimkhur vanga din, sorkar hmalakna, kohhran leh tlawmngai pawlte'n an enkawlpui a ni a, sum tam tak sènna a ni. Novel coronavirus in rawn luhpui tihna a ni lo.

    State páwna tangkhang dang, lo haw tur tam tak an la awm a, chu'ngte entawntlak leh fuihtu ṭha tak ni turin inbuatsaih ṭan rawh.

    Quarantine-a in awm chhungin inkaihhruaina leh hotute thu dawhthei taka zâwm turin kan inngen a, Mizoram hmingṭhatna ber thuawihna vawng tlat turin kan insawm a ni.

    Ram páwn hmun changkanga khawsa ṭhang in nih avangin mahni awmna hmun leh inthiarna vawn fai kawngah fuih ngaiah kan ruat lo che u.

    Quarantine-a awmte hi Covid-19 darh thut thei laka venghimtu leh rál beitu in ni.

    Quarantine centre hi sorkar in, zirna in leh kohhran hmunte a nih hlawm avang­in bungraw zah tur te, dimdâwi tur te, zûk leh hmuam kawnga fimkhur thiam turtein kan inngen. Engmah hi man loa lo awm tawp a ni lo tih hriain, engkim renchem hrâm a ṭha.

    Hun harsaah hian thinchhiat leh vuivai a awl. Mi dangte zài ngai thiam, hrawn nuam, boruak mila insiamrem thiam, mi dangte tihlimtu leh thlamuantu nih i tum ṭheuh ang u.

    Mutna, ei leh in leh thil dangah mahni in tluk a awm lo tih kan hriatpui che u. Sorkarin a rualkhai thei ang berin min hrût tih hriain, duhtui lutuk tum lo hram hram ang aw. Ram rethei kan ni tih hriain sorkar hmalaknaah lungawi zel i chíng ang u.

    Ei leh in tur neih te, ei leh in theia awmte hi a hlu. Ninawm leh hrehawm hre theia kan la dam te hi a lawmawm a ni.

    Tuna kan khawharna leh hrehawm kan tawrhte hi keimahni, kan chhungte leh kan ram himna tur, nakina kan lawmna tizualtu leh kan chatuan sawi la tling tur a ni. I thil tawnte chhinchhiah ngun rawh.

    Rilru hlim leh zângkhai nei turin páwn lam thian te, unaute leh chhungte nena phone hmanga inbiak hi a ṭangkai hle. Mi dang tihlimtu kan ni thei.

    Quarantine centre-a awmte'n rilru leh taksaah harsatna kan tâwk thei a, nangmahni ṭanpui turin duty an awm reng.

    Mi hrang, ze hrang neite ni mah ila, kan inanna lai - harsatnain a tlakbuak Zo fa vek kan ni tih hre rengin, dawhtheihna nen inngeih tlang taka awm kan tum dawn nia.

    Quarantine centre chhuahsan hnu, mahni inah inkulh hrang a, mahni invên leh invawn fimkhur a ṭul hunah pawh entawntlak ni zel turin kan duhsak che u.

    Kan chhungte bakah mi tinin min khawngaih a, min lainat a, min duhsak a, min ṭawngṭaisak ṭhin. Chhungte rilru tihrehawmtu leh mi dang tana phurrit siamtu i ni lo ang u.

    Lockdown bakah quarantine period paltlang tawhte hi chuan eng harsatna pawh an paltlang thei ang. Chuvangin, quarantine hun a zawh hnuah pawh Covid-19 dona kawnga theihtawp min chhuahpui turin kan sawm che u a ni.