Kan economic leh sum leh pai Dinhmun sawi thei an awm lo - MNF

MNF party chuan thuchhuah siamin, Congress party chu zah thupna atana Finance minister Zoramthanga, chief minister beiah an puh a; mimal leh sorkar - tu mahin Mizoram economic leh sum leh pai dinhmun chiah sawi thei an awm loh thu an tarlang.

May 16, 2020-a Congress party press release-ah, Finance minister Zoramthanga chu Mizoram sum dinhmun dik tak sawi theih loh avangin mi dang hnenah Finance enkawl hna pe tura an phût chungchang MNF hian an chháng lêt a ni. Kumin tir lamah kum 2020-21 budget estimate pass a ni a, a zat pawh a chian thu an sawi.

MNF chuan, Covid-19 in khawvel pumpui a tihbuai vek avangin khawvel economy leh nunphung pangngai a châwl vek a, tu mahin hmabak an sawi thei tawh lo nia sawiin, "Kan economic leh financial dinhmun pawh sorkar lian ber aṭanga tê ber thlengin chiang tawh lo leh rin thua kal a ngai ta vek a. Hetih lai hian tu mimal leh sorkar mahin 'Hei hi kan economic leh sum leh pai dinhmun chiah chu a ni' tih sawi thei kan awm tawh hauh lo. Tu pawhin, 'Kei chuan a dik takin ka sawi thei,' ti mah se, tu ma'n an awih hek lo ang," an ti.

Mizoram Chief Minister leh Finance Minister pawhin Mizoram economy leh sum leh pai dinhmun a tlachhe ta em em a ni tih chin chiang takin a sawi tih sawiin MNF chuan, "A tlakchhiatna zat number dik tak chu ani leh mi dangte pawhin sawi theih rual a ni bawk hek lo," an ti a; mipuiin Covid-19 laka inbuatsaih nan sum an thawh mek laiin, Congress MLA-te'n sum thawh an ui tlat a, sum thawh an ui vanga zah thup nan Finance Minister an bei ta niin an sawi.

MNF party chuan, Congress party an sorkar laiin sum an enkawl thiam lo zawk nia sawiin, sum enkawl an thiam loh vangin kum 2010-ah cheng vbc. 70 an ti lapse a, sikul naupang uniform leina tur cheng nuai 743.16 an ti lapse bawk niin an sawi a, "Sum tam tak a lo thlàwna tiluangral tawh ṭhin leh Mizoram timualpho fo tawhtu Congress party hi inen lêt ve rawh se," an ti.