Kolkata aṭangin mi 111 rawn haw mek

Mizoram sorkar thuneitute leh Calcutta Mizo Welfare Association (CMWA) Task Force hruaitute ruahman angin nimin khan Kolkata aṭangin lirtheiin mi 111-in Mizorama rawn haw turin Kolkata an chhuahsan. Rawn hawte hi bus paruk leh lirthei tê pakhat hmangin an rawn haw a, New Town-a Mizoram House kawt aṭangin Mizoram House-a hotute leh CMWA hruaitute'n an vailiam a ni.

CMWA general secretary Lalbiakzuala chuan Vanglaini palai zawhna chhangin, Kolkata aṭanga rawn hawte hi Mizoram sorkara Home department ruahmanpui ang leh West Bengal sorkarin phalna a pek anga haw an nih thu a sawi a, "An tluan chuan May 21, Ninganiah an rawn thlen theih kan beisei," a ti.

Lalbiakzuala chuan, Mizorama rawn haw mekte chuan an haw man anmahnia an intum thu a sawi rualin, "An vai hian CMWA-in Rs. 1,000 ṭheuh kan pài a, a harsa zual deuh nia hriat mi tlemte chu joint resident commissioner Pu Jacob Lalawmpuia'n pawisa a pai bawk," a ti a; kawng laka riak loin Mizoram an pan ding char char dawn thu a sawi.

CMWA General Secretary chuan, tun dinhmunah Kolkata-a awm lai leh khualzin tangkhang mi 350 vel an la awm a, damlo leh anmahni hruaitu tangkhang, thlawhtheihna a thlawh theih hun nghâk mi 140 vel an awm thu a sawi bawk.