Liverpool-in Manchester United an nawp nek dawn emaw an ti a, mahse, mipui beisei loh result a thleng -Anfield-ah 2-2 in team pahnih an inhnehtawk a, a lawm ber chu Arsenal an ni.

Match li zet a zawna an tlawm tawh avangin United-in Anfield-ah beiseina an neih hi tam takin an ring lo. Mahse, club lian inhmachhawn boruak danglamzia a lang a, United tlakchhiat lai berin Liverpool ṭhat vanglai an chelh thei.

Anfield-ah Lisandro Martinez hmangin United hian goal an khung hmasa zawk hial a, Cody Gakpo leh Mohamed Salah (penalty) ten rang taka an chhanlet avangin Red Devils hian mualneitu team an chhaih kawlh dawn em ni, tiin rilruah zawhna a awm hman.

Mahse, United an hmuhnnawm zui a, Amad Diallo hmanga si phurh sutin, hun tawp thlengin goal dang a lut tawh lo. Liverpool-in table chung ber an luah chhunzawm a, Arsenal aia an sanna point ruk chauh ni mah se, match khatin an khel tlem - United pawh 14-na aṭangin 13-naah an chho.

Barakhaih!

Pathianni zana team pahnih intawn hmain Liverpool-a vur tla avangin inkhelh theih loh mai a rinawm hman a, inkhelh hmaa Anfield-a vur thenfai a nih laiin United legend Gary Neville a uang a, an vur thenfai tawh chu khelmualah a theh lut!

Football pundit ni ta Neville hian Liverpool a huphurhzia a tihlanna a ni a, tun hnaia team pahnih 'form' thlirin a awm lo hran lo. Mahse, khelmualah thawnthu dang hrilhin kan awm.

Anfield-ah United an ṭang khawng tlat a, tlarhma nawr na tak Liverpool-in an duh angin an nawr thei bik lo. Red Devils player an thawkrim a, tun hnai an result thlirin a awihawm loh zawk hial!

First half-ah goal a lut lo a, second half-ah United zawkin hmahruaina goal an khung. Khel chhe em em mai Trent Alexander-Arnold ball pek sual aṭanga kal chu Bruno Fernandes-a'n Martinez a pe a, Argentine defender hian chiang zetin goal-ah a chantir.

Liverpool chhanna

Anfield-ah United fans thawm a ring zawk a, a inhmeh lo hle. Ruben Amorim leh a naute hlim chhung erawh chhum reilotê langa ral leh ang chauh a ni. Goal an chhuah aṭanga minute ruk hnu lawkah Cody Gakpo a inlar.

Alexis Mac Allister-a siamsak chu Dutch forward hian ṭha zeta a siamrem hnuin goal-ah a chantir a, United keeper che ṭha Andre Onana tan dan hman a ni lo; 1-1 a ni a, Liverpool lamah rilru a awn leh deuh!

United an talbuai zui. Penalty box-ah ṭul lo takin Matthijs de Ligt-a phar sang a, ball-in a kut a per. Referee-in a tirah ham lo mah se, video assistant referee a inrawlh a, referee Michael Oliver-a'n penalty spot a kawk.

A pe turin Mohamed Salah a lo pen chhuak a, Egyptian striker hian goal-ah a chantir. Anfield-a inkhel an nih bawk avangin Liverpool an chak ngei dawn niin a lang tawh.

Mahse maw...

Anfield-ah United an huai tlat - an tlawm chuan kum 1979 hnua a vawi khat nan league-ah a zawna a vawi li nan an tlawm dawn tih an hria a, Amorim hoin hetiang ang record duhawm lo siam hi an hlau.

Hun tawp nan minute 10 chiah a awm tawh a, Anfield-a Kop thawm ring takte ngawihtir an ni. Bench aṭanga luhtir Alejandro Garnacho chuan Diallo tan a siamsak a, kum 22 mi winger hian goal-ah a chantir.

Manchester derby-a Manchester City an hneh ṭumin Diallo hian chakna goal a khung tawh a, Liverpool lakah a team chu point a hlawhchhuahpui leh ta.

Reds tan Virgil van Dijk-a'n tauh goal-na remchang nei mah se, Onana-a'n awlsam takin a mansak a, Harry Maguire-a'n hun pek belha uiawm taka a tih goal loh kha United-in an ui vawng vawng ang.