Amorim-a United chu le!

Liverpool lakah Manchester United-in inkhel hmuhnawm min chhawpsak a, Anfield an lenluh hma lawka 'tla thei dinhmuna ding' tia an chanchin kan sawi kha an ni ta lo em ni chu aw, tih tur a ni.

Tun hnaia an result avanga 'manager lailawk' tih hiala koh fiam hlawh hman, tam takin ban tawk leh mai tura an sawi Ruben Amorim-a'n thutlukna huaisen thlak tak siamin, Newcastle United laka beisei phak lo Christian Eriksen leh Casemiro te bench-ah a dah.

Midfielder uai thla tawh pahnih hmun ruak luah turin Kobbie Mainoo leh Manuel Ugarte an lut a, midfielder pahnih an khel ṭhain, tlarhnung an pui ṭha a, tlarhma an thlawp ṭha bawk.

United tlarhnung an inrem ṭha a, Amorim-a'n 3-4-2-1 angin a naute rem mah se, 5-4-1 ang deuhthawa a kal chang a awm a, tlarhma nei ṭha Liverpool-in an su hawng hleithei meuh lo.

Manchester United captain Bruno Fernandes chuan, "Premier League hmahruaitu Liverpool lakah hetianga kan khel thei a nih chuan, engatinge hmun dangah pawh hetiang hian kan tih mai loh?

"Kan phu ang ngeiin sawisel kan tawk nasa a, table-a kan dinhmun thlirin a awm hliah hliah. Point kan hloh nasa lutuk a, keipawh ka hnual hman hle. Mahse, zaninah pangngai takin ka khel ve ta," a ti a, a hlim hle.

Portuguese midfielder chuan sawi zawmin, "Liverpool hmachhawn harsatzia kan hria a, mahse, kan theihtawp chhuahin, kan thinlung zawng zawng nen kan khel a ni. Hetah hian kan tawp mai thiang lo - kan inkhelh leh turah pawh kan chhunzawm a ngai.

"Anfield-a kan tihtheih chuan khawiah pawh kan tithei ang," a ti - Red Devils hian January 12, Pathianni zanah match an nei leh dawn chauh a, FA Cup third round-ah Arsenal an lenchilh ang.