Ferrari car khalh tur Hamilton a phur

Lewis Hamilton chuan Formula 1 season thar lo thleng tur a nghakhlel a, a team thar Ferrari car khalh a chakin a phur takzet tawh tih a sawi - a kum tam deuh tawh mah se chona thar a hmachhawn dawn a ni.

F1 champion vawi sarih ni tawh Hamilton hian Mercedes tan a contract neih lai a hmang zo, inremna neih aiin team thar neih a thlang zawk, hna awlsam tak a ni bik lo ang tih erawh a chiang.

Britain star Hamilton chuan, "Scuderia Ferrari zawm chu boruak a danglam, kum 2025 hi kan tan kum ṭha a nih ngei pawh ka beisei, kan nuna thil danglam a lo thleng a nih chuan a ṭha zawnga hman chhuah kan tum tur a ni.

"Car intlansiakna kawvelah hian thil tam tak ka lo tawng tawh a, infiamna huanga kan hun hnuhnungah pawh hmabak kan la nei zel, chumi hlenchhuak tur chuan ka rilru leh taksa a inpeih," tiin a sawi.

Vawiin January 7 hian Hamilton-a'n kum 40 a tling dawn, car intlansiakna sangah hian champion tam ber a nih rualpui Michael Schumacher-a nen record inṭawm an neih chu kuminah kalsan a tum ang.