Kluivert-a'n Indonesia a enkawl dawn

Journalist lar Fabrizio Romano tarlan danin Patrick Kluivert chuan Indonesia national football team a enkawl dawn. Kluivert hian kum hnih daih contract a ziak a, kum hnih dang pawhsei theih dan a awm bawk.

Ruahman dan chuan head coach atana Kluivert phochhuahna hun hi January 12, Pathianni hian Indonesia-ah neih a ni ang a, an hmachhawn chu FIFA World Cup khel tura inpettling a ni ang.

Kum 48 mi Kluivert hi a inkhelh hun laiin striker a ni a, Ajax academy chhuak niin Dutch club tana hming a chher hnuah AC Milan, Barcelona, Newcastle United, Valencia, PSV leh Lille tan a khel. Netherlands aiawh pawhin Kluivert hian match 79 a khel a, team enkawlah pawh sulhnu a nei ṭha.

Kluivert hian AZ, Brisbane Roar, NEC, Netherlands leh Cameroon-ah assistant coach hna a thawk a, Curacao leh Adana Demirspor ah te head coach hna a chelh tawh bawk.