National Games 2025 : MFA-in Mizoram aiawh tur probables squad a puang

28th National Games 2025-ah Mizoram an tel dawn a, Mizoram Football Association chuan Mizoram aiawh thei tur player 34 a thlang chhuak. Mizoram team hi coach B. Malsawmzuala'n a ho dawn a, H. Lalrindika leh Anand Gurung ten an thlawp bawk ang.

Inelna tel tur

Mipa inelnaa tel tur hi Santosh Trophy vawi 77-naa che ṭha aṭanga thlan a ni a, Mizoram hi coach Lalsangzuala Hmar leh manager K. Lalenghluna (L) te hoin semifinal an thleng. National Games-ah hian inelna thlengtu Uttarkhand bakah Santosh Trophy vawi 77-naa quarterfinal lut chin an tel a, knockout stage lut zingah Railways erawh National Games-ah an tel ve ngai lo thung.

Inelna hmachhawn turte chu champion Services, pahnihna Goa, semifinalist Mizoram leh Manipur, quarterfinalist Kerala, Delhi leh Assam bakah inelna thlengtu Uttarkhand te an ni.

Football inelna bik hi Haldwani, Uttarakhand-ah February 4, 2025 aṭanga neih tura ruahman a ni a, team khatah hian player 22 bakah official panga a ziahluh theih ang.

Probables squad chu

Mizoramin football-ah nasa takin hma a sawn a, hei vang hian National Games-ah pawh team ṭha ber a tir thei dawn lo. Aizawl FC-in I League an khel a, Chanmari FC-in I League 2 an khelh dawn bakah Mizoram Police-in All India Police Meet an hmachhawn dawn bawk.

MPL club ṭha pathum Aizawl FC, Chanmari FC leh Mizoram Police player-te thlan theih a nih dawn loh avangin Mizoram tan medal lak a harsa dawn. Chutihrualin coach Sawmtea leh a thawhpui Andrew Lalremkima Pachuau (manager), Rindika Hmar (asst coach) leh Anand Gurung (asst coach) te tan pressure a tlem sawt ang.

Mizoram tana harsatna belhchhah turin probables squad khel tur aṭang pawhin team zawm thei lo tur an awm. Chennaiyin FC midfielder Lalpekhlua chu India Under 20 squad-a koh a ni a, Chanmari FC-in SYS FC innghahna player pahnih Lalruatsanga leh Joel Lalmuanpuia te an lalut a, tawnhriat nei ṭha defender pahnih Ricky Lallawmawma leh Lalmuanawma te dinhmun a chiang lo bawk.

Mizoram coach Sawmtea chuan, "A phurawm khawp mai. Coaching staff leh player-te thawhhona a ṭhat chuan thui tak kan thleng thei a ni. Aizawl FC, Chanmari FC leh Mizoram Police player-te khel thei lo tur hi a pawi kan ti a, chutihrualin Mizoramin inkhelh thiam kan ngah tawh. Team ṭha tak kan la din thei a ni," tiin Vanglaini a hrilh. Nimin aṭang khan Mizoramin training an ṭan a ni.