Ranieri enkawl Roma an chak

Pathianni zan Rome Derby hmuhnawmah AS Roma chuan Lazio chu 2-0 in an hneh a, season bul an ṭan ṭhat tawk lohna chu zawimuangin an siamṭha chho zel a, chung lam panin an kal mek.

Stadio Olimpico-a inkhelah mualneitu Roma lamin bul an ṭan fuh a, chawlhlawk hmain Lorenzo Pellegrini leh Alexis Saelemaekers ten goal khat ve ve an khung a, anmahni goal an venghim tluan bawk.

Inkhel boruak sang takah Lazio an inbengdai vek thei lo, hun tawp hma deuhin striker Valentín Castellanos chu hnawhchhuah a ni a, a tawp lamah team pahnih buai deuh laih mah se hrem ngai khawpa che zui erawh an awm lo.

Roma manager Claudio Ranieri chuan, "Inkhelh ṭan hmain Lorenzo Pellegrin nen kan inbia a, mawhphurhna lian la tura a inpeih thu min hrilh, a sawi ang ngeiin Laizo lakah khan a hna a tlin takzet.

"Derby boruak hi chu a danglam, chak lo ni ila chuan stadium pawh chhuahsanin loin ka awm leh reng ang, tun ṭumah erawh kan tum ang taka khel chhuakin hnehna kan chang, hlim taka awm hun a ni," tiin a sawi.

Italian manager Ranieri hian team hrang hrang a lo kaihruai tawh ṭhin, tuna a enkawl lai Roma ngei pawh tun hma lama a enkawl tawh tho a ni, season an ṭan fuh loh vanga lak niin, a sang thei ang ber thlen pui a tum ang.

Lazio coach Marco Baroni erawhin an goal chhuah pahnih chu ven theih a nih thu sawiin, "Ka naute khan ven theih tur nia ngaih an chhuah, a bulpui ber chu kan inrem dan fuh tawk lo kha a ni a, insiamrem nghal thei chi a ni.

"Ball kan chânin kan che rang tawk lo a, ball kan chuh na tawk lo bawk. Chutihrual erawh chuan, inkhel chawnu lamah erawh kha chuan kan nawr na em em a, chak tuma kan beih let dan khan min tilawm," tiin a sawi.

Zanin dar 1:15 hian inkhel pakhat a awm dawn, champion tum ngam Atalanta chuan Juventus an lo mikhual dawn. Atalanta hian Serie A hmahruaitu an nihna nei let turin chak an mamawh - Old Lady hi Italian football inelna sang berah tlawm loa kaltluang mek an ni thung.