Zaninah League Cup semifinal first leg: Arsenal mualah Newcastle

Zanin dar 1:30 hian Arsenal chuan League Cup semifinal first leg khel turin Newcastle United an lo mikhual ang. Second leg hi February 5, Nilaini zan hian St James Park-ah khelh leh tur a ni.

League Cup a hlu?

English club liante inelna a sang zel a, nomawi chawi a harsa tial tial niin a lang. Chuvangin League Cup hi an ngaihthah lutuk erawh a rinawm loh - Gunners pawhin Arsene Wenger hunlaia an ngaihdan kha an thlak tawh.

Wenger kha chuan player naupang leh Premier League khel tlemte tana inlanna hunah a hmang ṭhin. Mikel Arteta erawhin a neih ṭhat a chhawr fo a, zaninah pawh a neih ṭhat zinga mi an inlan ngei a rinawm.

Emirates Stadium-ah kum thum chuang chu eng nomawi mah an hawn tawh lo, chuvangin eng title emaw ber chu Gunners hian an mamawh a, an banphak theih hnaivai ber chu League Cup hi a ni ang.

Newcastle tan League Cup a hlu zual. Magpies hian League Cup an la chawi lo hrim hrim a, nomawi an chawi hnuhnun ber pawh 1968-69 season daih tawh kha niin Inter-Cities Fairs Cup-ah an champion. Premier League awm hnuah Newcastle-in nomawi an chawi tawh lo.

Semifinal kalkawng

Arsenal hian third round-ah Bolton Wanderers 5-1 in an sawp a, fourth round-ah pawh team nem tho la hmachhawnin Preston North End chu 3-0 in an hneh. Quarterfinal-ah Premier League club Crystal Palace chu 3-2 in an hneh a, Gabriel Jesus-a'n hattrick a siam.

Gunners hian Palace an hneh ṭumin team ṭha an luhtir a, chutihrualin Arteta-a'n team ṭha ber erawh a thlang lo. Janury thlaah inkhelh tur a tam avangin Spanish manager-in player ṭha thlang tho siin rinrawl player pahnih khat a awltir tho a rinawm.

Newcastle United-in second round-ah Premier League club Nottingham Forest an hmachhawn nghal a, penalty shootout hmangin an hneh. Third round-ah Magpies-in Wimbledon 1-0 in an hneh a, fourth round-ah Chelsea 2-0 a an hneh hnuin quarterfinal-ah Brentford 3-1 in an hneh leh bawk. Eddie Howe-a hoten team ṭha an hneh chhoh avangin Arsenal laka hnehna chang turin inrintawkna an nei ang.

Engtin zel?

Gunners hian an match hnuhnung berah Brighton an hneh zo lo, tun kar tawp hian Manchester United nen FA Cup an khel zui leh nghal dawn, coach Arteta tan player siksawi thiam a ngai dawn hle a ni.

January thla chhungin Arsenal hian match khelh tur pakua an nei, chung zinga pakhat chu an khel tawh. Tun thla chhung hian nomawi an beisei pathum ngawt chu a bo duak thei dawn tihna a ni a, an chet fuh erawh chuan nomawi pathum an hnaih sawt thei thung.

Newcastle United pawh nomawi chawi chaka tuihal an ni. Eddie Howe-a'n tam a din thar leh hnuah nghet chho viau tawh mah se, an duh tak nomawi an la pet chhuak thei bik lo, tun hi an tan hun ṭha a ni ve bawk.