Aizawl FC an training ngawrh

I League-in thlasik chawlh nei mah se Aizawl FC erawh an chawl meuh lo. Victor Lalbiakmawia hote hian December 28, 30 leh 31 khan training an nei a, kuminah pawh January 3 aṭangin training an ṭan leh tawh bawk.

Mizo club hian January 9, Ningani zan dar 7:00 hian RG Stadium-ah Sreenidi Deccan an mikhual ang a, hemi zawh hian khualmualah hmahruaitu Churchill Brothers (January 12, Pathianni) leh sum hmang tam Inter Kashi (January 18, Inrinni) te an hmachhawn lehnghal dawn.

Aizawl FC coach Victor Lalbiakmawia chuan, "Fixtures a hautak nghal dawn a, team ṭha Sreenidi, Churchill leh Inter Kashi te a zawn zatin kan hmachhawn dawn. Kum bul kan ṭan ṭhat theih nan kan thawhrim a ṭul a ni," tiin Vanglaini a hrilh.

Mizo club hian hliam vangin captain Lalchhawnkima, midfielder Lalmuanpuia leh keeper Lalhriatpuia te an la chhawr thei dawn lo a, hrem vangin Lalruatthara'n Sreenidi a hmachhawn thei dawn lo. Chutihrualin Aizawl FC-in ISL club Hyderabad FC aṭangin Laldanmawia chu loan hmangin an lalut.

MPL champion Aizawl FC hian match ruk khelh aṭangin point ruk chauh an la hmu a, 10-naah an awm mek. Tun season inelnaah team 12 an tel a, team pakhat an relegate dawn. Mizo club hi Mizo hlnaga an khelh avangin inelna ṭantirh aṭanga relegation battle-a tel tura ngaih an ni.