PSG kutah Champions Trophy

Paris Saint-Germain chuan AS Monaco chu 1-0 a hnehin Champions Trophy an la a, coach Luis Enrique leh a nauten kum 2025 bul an ṭan fuh hle.

Stadium 974, Doha-a inkhelah team pahnihten goal an venghim ṭha dun em em a, hun pawgngai a zawh hma deuh chiahin Ousmane Dembele chuan goal awmchhun a khung, champion nan a tawk nghal bawk.

PSG hian tun hnaiah a zawnin Champions Trophy hi vawi thum an la tawh a, record nei ṭha ber ni bawkin ṭum 13 ngawt an champion tling tawh bawk a ni.

Inkhel thununtu zawk PSG tan Desire Doue-a'n cross bar a tih per a - Monaco goalkeeper Philipp Kohn chuan anmahni lama lut tur a dang hnem viau bawk, a bik takin Achraf Hakimi khung tur a dansak chu a ṭha hle.

Paris Saint Germain manager Luis Enrique chuan, "Monaco kha team ṭha tak an ni a, anmahni an inveng thiamin goal an nawr na thei hle bawk, keini lam pawhin remchang kan hmuh zinga pakhat chauh kan tihlawhtling thei a ni.

"Engtik lai pawh ni se, eng nomawi pawh ni rawh se, champion hi chu a hlimawm reng. A bik takin kum 2025 bul ṭan nan chuan duhthusam a ni ngei ang, hlawhtlinna dang pawhin min zui ka beisei," a ti.

Paris club hian Ligue 1 lamah hma an hruai mek, an chesual viau a nih ngawt loh chuan an champion leh pawh a rinawm. Mahse, Champions League lamah erawh ṭum thum nghawt an tlawm tawh, last 16 lut tur chuan chetsual a thiang tawh lo.